Homan & 鹿

25 November 2020 at 8:24:05 am

今屆HKIR獲選馬匹今日公布，一共有15匹外隊馬入，比預期中多。

香港短途錦標

一早到港加盟方嘉柏馬房嘅「川河達駒」將會掛頭牌登場，佢嘅國際評分比 2 號馬「旺蝦王」高 5 分，比 3 號馬「仁者荃心」更已經高出 10 分！另外三匹外隊馬都係來自亞洲，日本有「倫敦塔」（Tower Of London）及「野田重擊」（Danon Smash），新加坡派出「地獄火」（Inferno），值得留意「倫敦塔」係全場 14 匹馬當中唯一一匹一級賽冠軍。

香港一哩錦標

上屆冠軍「頌讚火星」（Admire Mars）重臨衛冕，但今年佢唔會再有讓磅優勢。岳伯仁就將一對於美國育馬者盃一哩跑冠、季軍嘅「澳國勳章」（Order Of Australia）及「文壇怪傑」（Lope Y Fernandez）帶來香港，留意兩匹馬上仗喺美國均有用 Lasix 利尿劑，再留意埋「澳國勳章」係補充報名加入戰團嘅。香港馬主名下「羅馬精神」（Romanised）亦以客隊身份參戰。香港馬方面，「美麗傳承」及「夏威夷」一對都會休後復出，最後當然唔少得擂台躉大熱「金鎗六十」，出馬較多嘅場合究竟會唔會成為佢嘅阻力呢？

香港盃

一共有十一匹賽駒獲選。當中最受注目一定係岳伯仁一對，派出愛爾蘭冠軍錦標冠軍「變魔術」（Magical）及愛爾蘭一千堅尼盟主「安恬」（Peaceful）出戰。而英國冠軍錦標亞軍「實勁力達」（Skalleti）亦會出戰呢項全日最高獎金賽事。而日本就派出上屆香港盃盟主「勝出光采」（Win Bright）、秋季天皇賞殿軍「野田優驥」（Danon Premium）及札幌紀念賽盟主「樸素無華」（Normcore）。日本並未騎師前來參與騎師賽，未知屆時配搭會如何呢？而香港就有五駒入選，分別有馬會盃冠軍「添滿意」及殿軍「與龍共舞」，究竟香港能否攞住番呢場呢？

香港瓶

全組得七匹，兩匹外隊。巴黎大賽冠軍「業界巨頭」（Mogul）為岳伯仁衝擊呢項盃賽。另一匹係二級賽德斯奧錦標亞軍既「鬍鬚漢」（Royal Julius）都獲邀出戰。而香港就有「時時精綵」代表出戰，今年第三屆挑戰呢項盃賽，細Field場合可唔可以贏多一屆呢？其餘代表包括馬會盃季軍「時時有餘」及上季遮打盃亞軍「任我行」。

每年都會臨近賽前都會有馬匹補入，獲選馬匹名單有機會於稍後時間有所增加亦不出奇，我地會密切留意相關消息。