【龍王子嗣贏哩半以上Group Race唔使等到年尾】

Tony

今個星期除咗日本打吡之外,仲有葵錦標同埋目黑紀念兩場級際賽。

星期六嘅準三級賽葵錦標,係3歲唯一跑1200m嘅重賞賽事,不過今年仲未正式升格為三級賽。上年2歲已經贏出函館2歲錦標嘅Bien Fait,縮返1200m外檔起步一樣交出超快前速,放到出嚟就靠大步檻返終點。因著京都1200m跑內彎關係,後面啲馬都難越雷池半步,Leggiero追足一條直路都追佢唔到只得第2,同樣守住前列嘅「同一天空」(One Sky)今場轉直路彎蝕咗唔少位,但係都追返一席第3。呢場啲馬話唔定喺之後嘅短途馬錦標或者高松宮紀念之中出場,大家可以當係參考下。

跑完日本打吡,仲有二級賽目黑紀念,大熱門落喺三連勝嘅King of Koji身上,沿途守住後列,入到直路等到有位就衝上嚟控制大局,造出四連勝,亦係首匹「龍王」子嗣贏出哩半以上嘅級際賽,唔使等年尾有馬紀念睇「農神節慶」表演啦。King of Koji嘅母線血統可以發現兩匹一級賽盟主「祖高娃」(Zhukova)同「既成事實」(Ghaiyyath),以兩匹G1 Winner都係棗色計,佢跑到2500m亦都唔出奇。嚟緊轉播秋季G1都可以留意下呢匹馬,話唔定係「白朗冰川」2.0。「愚者眼界」嚟到呢場G2都仲有第3,似乎講咗呢組馬都幾弱下;武豊連續唔知幾多個星期跑group變咗721,大家睇完「里見旗幟」遊馬河,就睇埋「石灰岩谷」點樣遊馬河,入直路拉到出啤酒園跟住追一段,今場表現不能作準啦。

Photo: Netkeiba
重溫:
https://www.youtube.com/watch?v=yuPcP76FtfA
https://www.youtube.com/watch?v=aMJ79QgG7DE