【黃雀在後】

Tony

今個星期日本三場級際賽加一場新馬賽戰報!

今個星期開始除咗中山同京都舉行賽事之外,因應京都即將重建同今年奧運關係,原本7-8月嘅小倉賽期縮水,搬咗去1月做第三場開催。原本喺中京舉行嘅愛知杯搬去小倉跑,呢場中女遺材賽16隻馬得3隻係4歲,其他都係5-7歲。「靈鳳韻事」直路上出咗頭但係後面仲有「電工使者」同America Bloom後面狂追,結果「電工使者」以7歲之齡贏出呢場三級賽,一口馬America Bloom已經6歲就嚟要退役,冇辦法喺退役之前贏返場級際賽。

今日除咗「雍容白荷」退役儀式之外仲有兩場級際賽,不過在此之前要報一場京都嘅新馬賽,武豊事隔10年1個月再著Admire系綵衣出賽,夥拍5億8000萬身價嘅Admire Virgo上陣,直路都唔使點大力推騎,就咁掃兩三鞭教一教隻馬就贏啦,贏得都不費吹灰之力。用一個term嚟形容今場初出,就係「公開調教」。友道康夫就未諗下場跑乜嘅,不過目標想跑打吡,如果趕到嘅,睇嚟武豊會有選擇困難症啦。留意今場亞軍係近藤利一前妻英子名下嘅Juana。

返嚟二級賽日經新春盃,上年「耀滿瓶」贏完呢場年尾就贏香港瓶,今年又係4歲馬贏,Mozu Bello喺直路上一衝就過晒,睇下之後嘅轉播賽會唔會見到佢啦。Red Genial、「里見紅石」同「山茶花」三隻留到落尾,追都冇得追呀!

最後就係京成盃,Sky Groove初出贏到甩晒,今日啲風吹到行一行架啦,雖然排外檔係唔好彩唯有焗住走三疊望空,入直路上彈甩對手兩三個馬位,全世界都以為佢贏得啦,點知嚟隻Crystal Black最後關頭掃晒。其實呢一組馬睇落都幾水下,Crystal Black可能會喺之後轉播賽 (今年皐月賞同打吡會轉播) 會見到嘅,不過主角就唔似輪到佢做啦。


重播:
https://www.youtube.com/watch?v=L684YrLbS0E
https://www.youtube.com/watch?v=5pDQVnpM9WQ
https://www.youtube.com/watch?v=NnLCBHjl-ZY
https://www.youtube.com/watch?v=IoBGmisXaEI