【魔法城堡初勝重賞 邁步前行復仇成功】

Tony

今個星期日本有三場級際賽,去片!

星期六先上演雌馬三級賽愛知盃,前面有「民族服裝」(Dirndl)開個快步速之下,留後嘅馬全面進場,一對社台一口馬「魔法城堡」(Magic Castle)同Rambling Alley入到直路一個揀出一個揀入鬥足半條直路,結果「魔法城堡」終點前岩岩好趕過Rambling Alley,初勝級際賽。賽後國枝榮就話隻馬會以維多利亞一哩賽做目標,呢隻上年三冠都有唔錯表演嘅馬可以繼續留意;一對公海朋友跟進馬「花火」(Centelleo)同「強大必勝」(Win Mighty)跑到報失,騎果兩個可以點解釋?
https://www.youtube.com/watch?v=aQS9HR34bNs

星期日頭盤二級賽日經新春盃,Tony由初出跟到宜家嘅Admire Virgo捧成大熱唔出奇,起步冇耐守內檔仲以為好事,點知入到直路啲跑法睇到Tony都要唱《哪裡只塞駿業里》,比「好快手」(Velox)頂住出唔到,結果就企咗喺度;反觀9月同Admire Virgo喺月光讓賽串Q嘅「邁步前行」(Shoryu Ikuzo),以3勝條件馬身份揹53公斤上陣,比上次月光讓賽有得受讓返Admire Virgo轉頭真係有著數,加埋團野大成全程走三疊生位包唔塞車,入到直路一騎就控制大局,乜仇都報晒!團野大成今次係第一次贏級際賽,雖然話出道初期表現不及岩田望來同齋藤新兩位,不過贏G2就遲來先上岸。「好快手」今場除咗攬炒Admire Virgo之外就一無是處,連近都唔近,唔識贏嘅馬就係唔識贏。
https://www.youtube.com/watch?v=dL8LjNpFj8U

最後到京成盃,放頭嘅Time to Heaven拉到個世紀慢步速出嚟,就益咗跟佢後面、「拉丁城市」(Resistencia)半弟Gratias,入直路趁Time to Heaven西咗出外檔就沿內欄殺上去,贏到收晒韁。雖然造出時間係慢,不過睇佢出腳好似裝摩打咁,嚟緊三冠戰線又可以bookmark多一隻,仲要父系係「真心呼喚」話唔定路程越長越好。
http://youtube.com/watch?v=YIrawGkDTL8

Photo: Netkeiba