【鬱金香賞現平頭冠軍 Titleholder贏彌生賞】

Tony

8 March 2021 at 3:11:54 pm

​

今個星期嘅日本有8位新騎師出道同9位練馬師開倉，新騎師當中以阪神出道嘅小澤大仁贏2場表現最好，中山出道嘅永野猛藏贏1場，兩位都係第1匹座騎即交出頭馬；新練馬師就有繼承角居勝彥馬房嘅辻野泰之同前騎師四位洋文各贏1場。

至於三場級際賽都相當精彩，星期六先舉行二級賽鬱金香賞，呢場櫻花賞預賽睇下武豊騎Meikei Yell騎到隻馬搶晒口，轉彎上晒口走仲以為唔輸？結果仲可以同沿途守住四五位嘅Elizabeth Tower鬥足一條直路一齊過終點，影埋相先宣佈平頭冠軍而唔係輸埋個1.6倍全熱門，真係算武豊好彩，兩匹頭馬就同影贏後上嘅Tagano Diana得第3嘅Stutti一齊出線跑櫻花賞。雖然Meikei Yell今場喺呢組仲可以恃質取勝，但今場隻馬留都留唔住都好難喺櫻花賞比到人信心；反而呢場Elizabeth Tower走勢唔錯差啲劏埋Meikei Yell，櫻花賞有力做巨人殺手。
https://www.youtube.com/watch?v=z8f2k_zqM5I

另一場中山嘅海洋錦標，新勝升班嘅「攀峰」(Alpinism)今場排2檔起步，諗住只要夠快擺前面就有嘢睇，點知起步一個唔該慢閘咁就輸咗，真係多得李慕華唔少；反而「反身舞步」(Contra Check)跑返正常地就精神，終點前將大熱「機伶夢」(Current Moe)趕過取得高松宮紀念優先出賽資格。「不凡」(Bien Fait)今場閹後初出就交出應有水準，呢個第3已有交代。
https://www.youtube.com/watch?v=AjJXgFl3Jy8

星期日就有彌生賞，橫山武史同大家返咗去睇幾年前嘅沙田2000米，典型「慢-慢-慢-快-快」場合，將「山茶花」(Melody Lane)半弟Titleholder慢放到轉彎開始加快，入直路彈甩Schnell Meister，成功收死埋Danon the Kid，報返上年東京體育盃同希望錦標兩敗之仇，「大鳴大放」(Duramente)首度有子嗣勝出級際賽；Danon the Kid今場沿途守住有遮擋位置，但係賽期啲賽事唔多利追，入到直路追咗一段連Schnell Meister都過唔到，然而對準備皐月賞收咗熱身之效，正賽仍然可以話擺下擂台陣。
https://www.youtube.com/watch?v=GuyHl0kmzGI

最後同大家睇一場中山嘅2勝條件賽，上場喺東京贏完1勝條件賽嘅Figlio Allegro事隔3星期升班再出，雖然轉彎入直路搵位有少少阻滯，但仍然輕鬆取得2連勝。呢匹青葉賞季軍兼「里見皇冠」半弟嚟緊上到3勝條件賽，唔知可唔可以繼續交出表現，準備跑年尾一堆大賽呢？
https://www.youtube.com/watch?v=SaOSkkKzJ7U