Homan

8 December 2022 at 2:48:11 pm

現年45歲嘅福永祐一喺今日公布嘅練馬師牌照考試中嘅七位合格人士嘅其中一位。

身為天才名將福永洋一之後，或許因為其父墮馬意外重傷引退，福永祐一初出道就備受注目，亦令佢背負著唔少壓力。當然佢好快就用成績去回應大家對佢嘅期待。第一年就贏得53場頭馬，之後因策騎「帝皇光輝」（King Halo，キングヘイロー）於日本打吡大賽的跑法受質疑，一度陷入低潮。

不過有實力嘅佢好快就走出困局，策Primo Ordine（プリモディーネ）首勝一級賽，再夥拍「榮進寶蹄」（Eishin Preston，エイシンプレストン）贏得朝日盃三歲錦標及於2001年攻下香港一哩錦標。之後就開始不斷有一級賽頭馬同於騎師榜穩佔前列。截止今日，佢喺日本中央競馬會合共取得2613場頭馬，繼岡部幸雄、武豊、橫山典弘後，第四位達到2600場頭馬嘅JRA騎師，當中有34場一級賽。

而八大競走只餘有馬紀念賽未有取得頭馬，海外除左頭先嘅「榮進寶蹄」外，仲有策名雌「西沙里奧」（Cesario，シーザリオ）攻下美國橡樹錦標及「一路通」（Just A Way，ジャスタウェイ）於杜拜草地大賽揚威。對於香港馬迷而言，除左「榮進寶蹄」外，佢曾經喺2014年贏得國際騎師錦標賽。另外，佢上年策「妙發靈機」（Pixie Knight，ピクシーナイト）出戰香港短途錦標捲入連環墮馬意外，結果鎖骨骨折而需要長抖。

喺日本嘅代表作一定要數到近年嘅三冠馬王「鐵鳥翱天」（Contrail，コントレイル），喺佢策騎下，「鐵鳥翱天」以不敗方式登上三冠馬王寶座，成為三冠馬王的主理騎師。

早兩個月已經有消息指福永祐一接受第一階段練馬師師考試合格，佢今日接受傳媒訪問指自己喺上年二月尾已經開始部署練馬師考試。佢話自己覺得自己無乜繼續做騎師嘅動力，之後聽左一啲關於練馬師嘅事後發覺練馬師呢個崗位有好多有趣嘅事，令自己成為練馬師嘅欲望變得強烈，所以就努力溫書喇！

佢話今次係自己自中學生以黎第一次咁努力溫書，不過佢就話呢樣係佢自己想做嘅野，過程並唔辛苦。但佢嘅時間表就相當緊密，因為佢自今年二月尾開始就平日日頭操馬，之後就溫書，星期六、日就策騎上陣。佢嘅成績都唔算大幅下滑。最後佢仲順利合格，並於下年三月起就以練馬師福永祐一嘅身份活躍於日本馬圈，連同一年實習期，理論上佢最快會喺2024年3月開倉。

福永祐一合格嘅消息傳出後，得到唔少騎師嘅祝福，除左同期嘅和田龍二外，武豊亦有恭喜對方，並指福永會係一個好嘅練馬師，並希望有機會為對方效力。


Source: nikkansports
Photo: HKJC
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1