【預賽之鬼野田重擊又贏一場】

Tony

日本秋季賽事正式開始,今次嚟到中山同中京睇下三場級際賽同一場條件賽。

星期六中山舉行三級賽紫苑錦標,派出三張秋華賞入場劵。今場慢步速益咗沿途跟前嘅「馬國女神」(Maltese Diosa)入直路首先突圍,後面對手騎足難越雷池半步;二三名爭持激烈,最終由Pallas Athena同Season's Gift分列二三名取走優先出賽權,但三駒今場表現去到秋華賞應該唔夠Darting Tact跑。至於橡樹季軍Win Mighty今場起步慢咗全程留後之下,直路追一段亦所負不遠,正賽仍可留意。

往年9月阪神賽期轉去中京跑,今年嘅二級賽人馬錦標陣容就有如高松宮紀念翻版,全日本最top嘅短途馬除咗「放聲歡呼」(Gran Alegria)同「魔族閃焰」(Mozu Superflare)之外都嚟齊晒。結果一到唔係G1場合,又係「野田重擊」贏呀!三浦皇成由得前面啲馬鬥放,入到直路冇耐就控制大局,取得短途馬錦標優先出賽資格。不過呢隻預賽之鬼,去到正賽可以第一時間飛走佢;「曲調夫子」(Mr Melody)今場跑第3表現恰如其份,奈何面對野田系預賽加乘,贏唔到都係意料中事,去到短途馬錦標仍值得留意。Bien Fait同「野田重擊」同一個位跑,但入直路唔夠其他對手衝,就證明現階段隻馬級數不足以喺大賽爭勝。至於夏季短途系列冠軍,就由今場冇跑嘅Red en Ciel以14分封王。往年拎呢個分數都唔夠贏,今年就夠贏,其他對手即刻變菲律賓賭神:「14分都有得贏短途系列?」

中山嘅京成盃秋季讓賽,就有臨門一步輸埋個夏季一哩系列冠軍嘅戲碼:櫻花賞季軍Smile Kana恃今場輕磅起步之後快放,上屆盟主Trois Etoiles梗係唔執輸跟住佢尾,兩隻馬一放一留,最後鬥足300米直路,結果終點前Trois Etoiles趕過Smile Kana衛冕成功,兼拎走夏季一哩系列冠軍。Smile Kana今場跑到一絕咁靚,要問唯一敗因,就係排最外檔起步搞到早段浪費腳程。而夏季騎師系列,就由今個星期停賽嘅福永祐一勝出。

最後就係中京嘅2200米3勝條件賽月光讓賽,Admire Virgo選擇今場復出,排到17檔走三疊都唔怕,入到直路冇耐就拍住前面對手跑,上完條斜路就控制大局。賽後友道康夫就話唔會跑菊花賞,之後集中跑2000米賽事,相信出年大阪盃會係爭勝要角。

Photo: Netkeiba
重播:
https://www.youtube.com/watch?v=4ZK3SuMqSXw
https://www.youtube.com/watch?v=pXxudsTvv-Y
https://www.youtube.com/watch?v=eORZpd27RJg
https://www.youtube.com/watch?v=Q5DEcJSHy3w