【頂唔順】潘頓稱無脊醫就完季 馬會批准其就醫要求

Homan

1 April 2022, 10:01:47 am

作為運動員,有一啲傷患隨身並不意外。騎師亦都唔例外,不時需要治療紓緩痛症。

騎師潘頓從騎多年,上年12月亦曾捲入墮馬意外,曾經休養一段時間。由於近排感到痛楚,決定預約脊醫協助。不過今早起初前往睇醫生被馬會因Racing Bubbles而拒絕。佢今早向SCMP透露自己已盡力忍痛上陣,但而家已經到左一個地步係如果無足夠治療的話,佢將唔能夠喺馬季餘下賽事中上陣。

潘頓上年5月曾因背傷喺陣上退下火線,今次要求亦非苛刻。畢竟劇痛仍然上陣不但對自身安全構成威脅,對陣上其他騎師都會有危險。

馬會審視潘頓情況,喺今早稍後允許潘頓申請預約脊醫。而該名脊醫喺協助潘頓前,需接受快速檢測(RAT),並要由馬會人員監督下完成治療。賽馬事務執行總監夏定安接受SCMP訪問時表示喺現行政策下馬會盡量避免騎練及其家人外出。如果真係要離開Racing Bubble,佢地會每個個案獨立審視處理,作出適當決定。

佢指出馬會現時為騎師及其家人提供一流醫療及物理治療服務。呢啲體育物理治療師非常專業且曾為奧運運動員服務。佢地現時專責為馬會騎師服務,協助佢地處理受傷及復康治療,並唔會處理騎師以外嘅病人。佢地每日都會都會喺馬場騎師室候命。

不過記者Lawrence Wadey就表示現時被禁離開馬場嘅騎師們,雖然得到物理治療師協助,但似乎缺乏物理治療需要嘅器材,如超聲波機及低週波治療器(TENS)等。 低週波治療器可協助患者肌肉放鬆、痠痛舒緩及減輕不適症狀。而一旦超聲波機需要使用時,馬會拒絕有關要求,未知基於咩原因下拒絕。睇下之後馬會唔會為左一班騎師安排有關器材喇!

來源:https://twitter.com/LawrenceWadey/status/1509784585592516609

Source: SCMP, HKJC, Lawrence Wadey
Photo: HKJC