【韓國打吡前瞻】日本馬主有機？

Ramos

15 May 2022 at 4:16:34 am

第二十五屆韓國打吡將於今日當地時間下午4:20上演，同時今年亦為韓國賽馬踏入第一百週年，進入一個新里程，期望韓國賽馬業繼續進步，將來更能於世界舞台中佔有舉足輕重的地位。

韓國打吡為首爾馬場的第八場賽事，途程為1800米泥地，先於內圈起步，直至最後彎位後才移出外圈直路衝刺。今場賽事將有15駒列陣，其中一匹為日本馬主猪熊広次的「巴魯」系賽駒，3號馬 Tiz Barows，此駒暫時出賽四仗共獲兩冠兩亞，雖在較低班的賽事出戰，但陣上演出不斷進步，近兩戰於1700米賽事走勢唔錯，相信仍有不俗上升空間，今場續配衛滔禮執韁，但如要爭勝，相信都要問一問上仗跑過三冠頭關 - KRA Cup Mile 嘅三甲馬。

三冠頭關 KRA Cup Mile，四月於釜山馬場舉行，該場出戰有上年的最佳兩歲馬 Complete Value，前速銳利的 Seungbusa，兩駒鬥足頭千五米，但係殺出一匹程咬金 Captain Yankee，最後一百米從後趕過前兩駒偷襲成功，勇奪三冠首關。Complete Value出賽七戰獲五冠兩亞，5W皆在兩歲時取得，包括二級賽 Breeders’ Cup，今年兩戰暫時兩度做呀二，且看今場可否擺脫二奶命成為打吡真命天子。

其他參賽馬方面，Seungbusa 前速最佳，相信會是今場主宰步速的一匹賽駒，且看初跑千八能否率先走甩。Captain Yankee本身以釜山為基地，上仗於三冠首關落後頗多嘅情況下展示驚人變速力摘下桂冠，今場作客到首爾，睇吓能否食住個勢再下一城。

Winner Star 為今場曾勝同程嘅馬匹，雖上仗於 KRA Cup Mile 演出失望，但勝在賺取氣量經驗，如其他主要對手稍有差池，有權殺出重圍。Wow Wow (唔係牙買加嗰隻) 出道至今演出準繩，六戰全入三甲，亦有力一爭。

Source: KRA
Photo: KRBC