Ramos

1 September 2022 at 3:48:27 am

韓國國際賽將於星期日在首爾馬場隆重上演，剛於一小時前進行了排位抽籤儀式，而家就同大家睇睇參戰馬匹抽到咩檔位吧。

首先係韓國短途錦標，香港代表「錶之智能」率先抽檔，由馬主親自上台抽，結果抽到8檔起步，馬主表示對所抽到的檔位感到滿意，加上初到韓國參戰，感到興奮不已，亦十分期待週日的賽事。日本代表 Raptus ，則由練馬師代表抽檔，原先希望抽最內檔起步，但事與願違抽到9檔，不過練馬師代表認為其前速可以克服這個檔位，相信問題亦不大，另外新加坡代表「人生如此」抽到3檔，英國代表「雁南飛」則抽到11檔起步，至於韓國代表，騎師衛滔禮為其坐騎 Morfhis 抽到7檔起步，East Jet 抽到5檔，Eoma Eoma 抽到12檔，Raon First 則抽到4檔起步。

到了韓國盃，都係由香港代表抽先，「黃金甲」由練馬師代表抽檔，抽前接受訪問希望抽到中檔，不過最後抽到最內檔起步，與2019年其前廄侶「逍遙自在」抽到同一個檔位，睇吓賽事早段可唔可以盡快搶到喺前面喇；英國代表「才智紳士」抽到2檔；日本代表「輕而鬆」抽到4檔起步。韓國代表方面，去年 Grand Prix 冠軍 Haengbok Wangja 抽到5檔，另一主隊希望 Winner’s Man 抽到6檔，Raon The Fighter 抽到10檔，上屆盟主「文學主任」抽到8檔，而休戰接近3年的「渡江」，年內初出就跑呢場，抽到12檔起步。

Source: KRA, KRBC