【面向黑暗】賽馬界被揭屠殺退役馬 英國馬會正視事件

Homan

20 July 2021, 3:34:22 pm

英國廣播公司節目Panorama琴晚指控賽馬界將退役馬被運往屠房,並被屠殺及加工成為食物。

節目以伊雅樂事件作為切入點,揭開賽馬界如何對待退役賽駒。愛爾蘭有賽駒退役後會運往英國Drury & Sons屠房,該屠房將佢地殺死,並將佢加工成為食物。Royal College of Veterinary Surgeons院長Barry Johnson表示做法好差,認為無必要將愛爾蘭既退役馬運到英國屠殺,應該根本無必要咁做,做法令人難以理解。而事實上英國馬會有一套退役馬指引,甚至如果需要將馬匹人道毀滅,亦不應該讓馬匹受精神上既痛苦。明顯今次做法與指引有不同。

而Drury & Sons屠房曾因延誤治療一匹未能站立的母馬而違反英國動物福利法。當時負責人Potter被處以兩萬兩千一百七十鎊(約二十二萬港元)罰款。今次因Panorama揭發,相信Drury & Sons屠房都會有手尾跟,據知英國食品標準局已向Panorama要求Drury & Sons屠房拍攝到既片段,以便調查該屠房有冇違法當地法例。

現時每年約有兩萬匹賽駒出道並於當地作賽,佔全英馬口約百分之三。退役馬中只有少數會以配種馬作第二馬生。若未能配種,英國馬會近年都會安排賽駒轉型為馬術賽駒,並開設Retraining of Racehorses 網站登記,避免退役馬「失蹤」並受不公平對待。現時只有約九千匹退役馬登記,顯然有啲退役馬唔知去左邊。

英國馬會暫時每年投放約一百四十萬鎊(約一千四百萬港元)於照顧退役馬匹處。佢地表示賽馬界需要確保所有退役馬既蹤跡都應該可以追蹤,現時處理上仍有不足既地方。英國今日會召開臨時會議,討論能否完善有關做法,改善退役馬待遇。

希望今次報導可以令當地退役馬待遇有改善,甚至可以提醒練馬師及馬主處理退役馬有啲咩途徑,而非單純運往屠房。每一個界別都有其黑暗面,若能正視黑暗,對症下藥,先可長久。當然講就好容易,且看英國馬會如何應對。

Source: Racing Post
Photo: Racing Post