【霍利時副練遲左登入 遲來一分鐘遲疑一分鐘 從出賽變做目送】

Homan

8 February 2021, 6:22:41 am

練馬師霍利時原本今個星期三有五匹正選馬上陣送歲賽,但今早排位後,其所有馬都退出競賽。綜合各傳媒報導,霍利時副練戴兆麟因為唔記得而遲左一分鐘登入申報排位出賽,以致所有霍利時賽駒被競賽董事小組著令退出。

霍利時就問點解同場出現兩匹馬申報相同騎師,馬會就會於8:05通知練馬師,並容許作出修改。反而今次遲一分鐘就唔可以。首席受薪董事祁禮謙就表示規例係清楚寫明既,所有練馬師都唔會例外。而事實上練馬師何良亦曾於2005年出現相同情況,而被逼退賽。

霍利時就話如果有電話提醒佢既話,事情就唔會發生。佢表示佢於早上七點半收到電郵提示佢仍未就星期三賽事申報出賽。但七點半仲係跑道未收操,所以未能閱讀提示電郵。祁禮謙就話就住練馬師何良既情況,佢地曾於2007年之前係利用電話系統,於截止前半小時打比未申報出賽既練馬師。之後佢地於2007年改以電郵提醒。或者搵人教佢將電郵信箱加入去部電話到,應該會好啲。

祁禮謙就事件對馬主感抱歉,但重申準時提交報名及申報出賽係馬房責任之一。

五匹正選馬為「水箭龜」、「型感」、「勝感」、「甲烷」及「爪皇烈焰」而後備兩匹為「天德」及「噴火龍」。

Source: SCMP; On.cc
Photo: Kenneth Chan