【阪神牝馬錦標添翼再勝一仗 Bathrat Leon紐西蘭錦標大勝】

Tony

13 April 2021 at 10:09:09 am

​

繼續跟進今年嘅新人騎師，橫山琉人上陣一個幾月，終於喺星期六中山賽事中打開勝門。留意此橫山不同彼橫山，佢阿爸係專攻跳欄賽、早兩年因傷退休嘅橫山義行。兩位新女將永島真奈美同古川奈穗喺新潟同藤田菜七子同場作賽，當中永島同藤田更喺一場1勝條件賽中包辦一Q。

大賽方面除咗櫻花賞，星期六仲有兩場二級賽。先上演嘅阪神牝馬錦標，上年曾報名但最後無出戰秋華賞嘅「添翼」(Des Ailes)，今年成功贏3勝條件賽升班後首戰級際賽就喺門前混戰下趕過對手，取得下個月維多利亞一哩賽優先出賽資格，同樣係社台一口馬嘅「魔法城堡」(Magic Castle)上場贏完今場縮程400米都有第2，直路喺馬群中間拎位殺上去都相當精彩，都幾少見大野拓彌走位咁神勇架喎。
https://www.youtube.com/watch?v=jBa1W8txW1A

另一場中山嘅紐西蘭錦標，古川開齋馬Bathrat Leon之前喺三級賽上名，今次面對低一班嘅對手兼換藤岡佑介上去自然如虎添翼，起步放到頭入直路再騎兩下已經彈甩對手，結果大勝5個馬位返嚟，同京成杯亞軍Time to Heaven、「城中天虹」(City Rainbow)一齊取得NHK一哩盃出賽資格。
https://www.youtube.com/watch?v=4EJncbWZKV0

嚟到星期日，阪神除咗櫻花賞之外，仲有兩場公開賽。首先係表列賽勿忘草賞，之前品題過嘅「神業」全妹Big Ribbon都有份跑，可惜入直路遲遲都加唔到速威脅唔到前面對手，最終只得一席第3，橡樹好大機會行人止步；反而係沿途守住二疊嘅Stellaria入到直路趕過放頭嘅A Shin Hiten贏出呢場賽事，加埋啲獎金開入去跑橡樹機會都幾大。
https://www.youtube.com/watch?v=MxjuOtXZEjE

至於另一場大阪漢堡盃，Miss Mamma Mia呢匹地方轉中央嘅馬跑長途賽繼續交出表現，今場換福永祐一上陣，睇佢走位真係化不可能為可能，沿途走內檔，入直路夠晒他條咁抽出去外檔殺上去。正當大家以為隻「沉醉節拍」(Heat On Beat)都到啦，結果舊肉到咗口都要嘔返出嚟，Miss Mamma Mia終點前趕過取勝。阪神塊地近期快到阿媽都唔認得，除咗櫻花賞打破場地紀錄時間之外，呢場2600米亦都跑出2分35秒1，打破上個月「神聖之力」(Divine Force)嘅紀錄時間。
https://www.youtube.com/watch?v=7b30Lp5YD04