【阪神兩場級際賽戰報】

Tony

19 April 2020, 5:23:47 pm

今個星期開始連續三個星期唔比騎師來回關東同關西出賽(第三場不受限制),令部份騎師揀喺阪神出賽就要放棄皐月賞。除咗中山有Grand Jump同皐月賞之外,阪神亦都有兩場三級賽舉行。

星期六先上演雅靈頓盃,呢場前三名會有NHK一哩盃優先出賽資格。朝日盃未來錦標亞軍Taisei Vision今場復出換咗石橋脩上陣,沿途守住後列,入到直路趁馬群散開沿內欄衝上嚟取勝,姿態相當輕鬆,暫時佢同Satono Impresa會係NHK一哩盃兩強,上星期贏出紐西蘭錦標嘅Luftstrom亦有力一爭,「戰舞者」話唔定又會選擇縮程賺級數,不過石橋脩就要諗下正賽騎Taisei Vision定係Luftstrom啦。馬女「鍍金鏡」(Gilded Mirror)就喺終點前趕過咗Prince Return,一齊拎優先出賽資格。「鍍金鏡」係上年短途馬錦標賽日轉播嘅2歲1勝1600m嘅出賽馬,呢場賽事近年水準幾高,2016年有「太空隕石」贏出NHK一哩賽,前年又有「反身舞步」贏到三級賽。上年「鍍金鏡」跑第3,冠亞軍「馬國女神」同「魔法城堡」先後喺級際賽不勝有位,而佢跑正賽又會唔會變成「太空隕石」2.0呢?

星期日就上演天蠍錦標,結果開出上個月船橋舉行嘅大尾光紀念賽翻版Q。Westerlund沿途留內欄尾二位置,但係轉直路彎對腳就裝咗摩打咁爆上嚟奠定勝局。睇佢贏法就似同日嘅「為食格格」,大家對比返兩隻馬由直路彎開始踩油,相似度都有九成,唔同在「為食格格」守得比較前少少。Westerlund之後出戰三級賽或者地方交流賽事都可以留意。「關鍵一擊」今次跑岩晒都係要輸,最後影相不敵Another Truth得第3,喺呢組係有級數,可惜Westerlund表現出色,時不與我。

Photo: Netkeiba
重溫:
https://www.youtube.com/watch?v=2spfXn6GVO8
https://www.youtube.com/watch?v=7dfTk4mqOCE