Homan

10 January 2022 at 4:06:52 pm

香港近日受omicron影響，疫情反覆。就算馬會喺1月5號減少入場人數，但都難抵及後確診嘅馬主入場觀賽。

有見及此，香港賽馬會繼上週三收緊入場限制後，再進一步收緊。嚟緊三次賽事，只允許職員、馬會幹事、持牌人士及為賽事進行必須在現場工作人士入馬場。其他人士將不獲入場，包括馬主、會員、傳媒及馬迷。

而受早前確診馬主曾入場觀賽影響，今早馬會亦安排受影響員工做檢測。而由於確診馬主為「機緣巧俠」嘅馬主之一，故練馬師文家良及當晚騎師莫雷拉亦需做檢測，兩人今早未有喺晨操亮相。

而據SCMP報導，兩人檢測結果呈陰性，不過由於病毒或有機會潛伏喺人體一段時間先發病。兩人將定期接受測試。而莫雷拉會如期上陣並於星期三賽前做例行病毒測試，以策萬全。

現時馬會未就1月20號後嘅賽事訂下模式，不過馬迷可以重新入場或許要等至少一個月，畢竟就算20號後放寬，都唔會係普羅馬迷先啦。

Source: HKJC, SCMP
Photo: HKJC