【閃電錦標】珠峰錦標冠軍「綠化帶」秋季初上陣

Homan

18 February 2022, 8:13:08 am

上星期上演完柯爾錦標後,今個星期維省就喺費明頓馬場上演直路一級賽閃電錦標。

珠峰錦標包辦頭三名嘅賽駒都會出戰呢項直路賽。當中珠峰錦標冠軍「綠化帶」(Nature Strip)會交由賈傑美策騎,排六檔。呢匹澳洲短途王上場贏出維省馬會短途經典賽後,就一直休息至今。上年賈傑美曾策「綠化帶」贏出閃電錦標,睇下可唔可以重溫舊夢喇!而珠峰錦標亞軍「隱秘俠士」(Masked Crusader)於出戰珠峰錦標後增程落第,今場將會初試費明頓1000米,鞍上人用上麥利奧,人馬曾於今季初喺考菲爾德上陣贏馬。

另外,上仗擊敗「隱秘俠士」嘅快放馬「愛德華多」(Eduardo)亦出會出戰,呢匹珠峰錦標季軍繼續由羅理雅執韁,生涯出戰費明頓三次都贏唔到馬,睇下今次又如何。而香港馬迷舊朋友柏寶就會騎三歲馬「贏利」(Profiteer)出戰,該駒兩戰費明頓全勝,但今仗對手大幅增強,將會受考驗。同場另一匹三歲馬係古摩亞育馬場錦標冠軍「家事國事」(Home Affairs),麥道朗喺「綠化帶」及「家事國事」揀左後者,睇下有讓磅下會有點嘅表現喇!

另外,前屆冠軍Gytrash與薛凱華故劍重逢,而新加坡回流賽駒「地獄火」都會上陣,配上連達文。

賽事會喺香港時間下午1點25分上演。


Source: Racenet
Photo: Racenet