【金鎗棄戰安田】練馬師以健康為由避戰 何澤堯指「金鎗六十」值得獲得更多

Homan

9 May 2022, 1:07:41 pm

「金鎗六十」贏得今屆冠軍一哩賽後,馬主指會接受日本邀請出戰今日安田紀念賽。當時就話及後會與練馬師呂健威研究遠征所需要嘅事項。而呂健威及後就話自己要多啲時間研究,會喺未來十日落決定。上星期六傳媒再向呂健威查詢遠征嘅準備工作時,佢就話自己今日會同馬主食飯,到時再決定是否成行。

今日多個傳媒報導,呂健威與馬主食飯後決定「金鎗六十」放棄遠征安田紀念賽。「金鎗六十」將會抖暑,並喺下季繼續在港上陣,以香港一哩錦標三連霸為目標。上仗冠軍一哩賽後,賽後報告指「金鎗六十」有輕微中暑,未知幕後是否因此放棄遠征計劃。

而根據SCMP報導,主理騎師何澤堯接受訪問時指對「金鎗六十」最終未能成行感失望,佢認為「金鎗六十」值得獲得更多。佢喺訪問就話佢今日收到練馬師呂健威通知「金鎗六十」唔會遠征日本,認為「金鎗六十」喺其他馬場上陣會有風險。佢表示自己理解呂健威同馬主嘅決定,畢竟佢曾安排「幸運如意」出戰2018短途馬錦標,但該駒嚴重受傷被逼退役。但個人對「金鎗六十」放棄遠征呢個決定感到失望。

何澤堯話其實可以照前往日本,因為佢認為「金鎗六十」值得出外一試。畢竟賽駒已經贏左好多獎金,用一啲錢喺「遊機河」上都可以,屆時發現未能適應當地環境或場地唔適合可以選擇退出賽事。不過其實日本賽駒就算出戰一級賽,都唔能夠因場地原因而臨場退出,如需退出要因為受傷或染病。

佢慨嘆如果「金鎗六十」並非於香港受訓,而喺日本或英國的話,佢早已走遍世界各地上陣,如杜拜或美國等地。佢認為「金鎗六十」可以應付唔同馬場,亦不限於右轉賽事。佢認為「金鎗六十」係特別嘅一匹,應該得到特殊對待,要用唔同方法部署。

從SCMP嘅訪問中,可以睇到何澤堯好想「金鎗六十」可以成行。近年日本馬后「杏目」(Almond Eye,アーモンドアイ)都曾多次於賽後中暑,佢亦曾於杜拜草地大賽後因中暑而放棄出戰凱旋門大賽。若果你覺得「金鎗六十」今次未能成行而影響其成就,唔知你會唔會覺得創日本紀錄,競賽生涯贏得九項一級賽嘅「杏目」,但未有為日本贏得凱旋門大賽而降低其評價呢?不妨留言傾下。


Source: SCMP, 新報馬簿