【違反防疫要求】賈傑美等四騎師被罰長期停賽 柏寶漁人得利

Homan

27 August 2021, 2:56:25 pm

琴日包括賈傑美在內四位維省騎師被控違反維省居家令(相關報導:https://bit.ly/38fkmil),被即時停賽十四日。今日維省馬會開會討論佢地既正式處分。

維省馬會開會後決定罰四位騎師包括賈傑美、苗康文Ethan Brown及Celine Gaudray由今日起停賽三個月,至11月26號先可以復出策騎。報告內容指即使四人每位需要繳交5,452澳元(約三萬港元)罰款,但為左突顯騎師違反居家令嚴重性,因此決定罰四位騎師停賽三個月。雖然佢地被禁出賽,但佢地仍然可以出席晨操及試閘。不過,由於佢地違反居家令,佢地最快9月9號先可以出席晨操及試閘。

剛季維省城市冠軍賈傑美就於社交媒體表示歉意。佢感到羞愧及對自己感失望,佢認為自己令家庭、朋友、馬迷及維省居民失望。佢應得維省馬會既懲罰,會於停賽期間反思自己既錯誤。

而原本聽日賈傑美就會策騎Behemoth爭衛冕文西錦標,不過現時因為停賽而需易配。最後幕後決定搵柏寶為Behemoth執韁。柏寶現時位列維省城市騎師排行榜第二,雖然只係開左幾個星期,佢已經取得五場城市頭馬,頭馬率為百分之二十五。睇下現時手風唔錯既柏寶會唔會可以自2017年「詠彩繽紛」後再贏一級賽喇!

Source: Racent; justhorseracing
Photo: Racent