Tony

23 March 2022 at 9:56:36 am

今個星期日本撞正公眾假期跑三日馬，除咗阪神大賞典仲有公佈5個皐月賞出線位。

星期六頭場就有中京嘅1400米三級賽獵鷹錦標，對嚟緊轉播NHK一哩盃有參考作用。「明媚島」(Isla Bonita)子嗣Purpur Ray喺上年一直都係跑一哩為主但係一上級際賽就冇影，今年第一次縮程1400米都係輸比Toshin Macau得第2，咁好表現再跑多次1400米，兩隻馬同場再對過名次都唔同晒；Purpur Ray今場雖然出閘慢少少但係好快跟返上前沿內檔推進，入直路見到空位就自動衝上嚟贏後面1又4分3馬位；Toshin Macau沿途走馬群入面，直路塞過車嚟但係開晒門之後反應麻麻結果跑第5。
https://www.youtube.com/watch?v=olll-6D1bDM

阪神就上演2000米表列賽若葉錦標，10匹馬爭2個優先出賽位。1月出戰1勝泥地賽勝出嘅良血馬Desierto轉戰草地一樣冇問題，6檔起步就搶出嚟自己放，頭1000米雖然有少少論盡但係放住60秒8都幾輕鬆，岩田康誠轉彎再騎一段彈甩對手後面想埋身都埋唔到，結果就咁一放到底，同Verona City一齊拎走入場劵。Verona City決定唔跑皐月賞，轉跑京都新聞盃；岩田康誠經過第二日春季錦標之後就決定騎返Desierto出戰皐月賞。2匹貴價馬都出唔到線，上場希望錦標第4名、身價1億9000萬圓嘅Fidele沿途走位唔上唔落，直路都衝唔贏Verona City結果跑第3；至於身價5億1000萬嘅Shonan Addeybb上場贏完未勝利之後跑呢場，今場沿途冇段好睇結果跑第7，其實隻馬唔係咁勁，係勁嘅今場已經贏咗啦！
https://www.youtube.com/watch?v=6DKiXfjwm0I
同場加映岩田康誠訪問大炎上：https://www.youtube.com/watch?v=yRwQY5RvYLY

星期日阪神就上演3000米二級賽阪神大賞典，「緣厚情摯」(Deep Bond)跑完有馬紀念之後留待今場打衛冕戰，今場一路守住中間位置，入直路對住「鐵甲巴魯」(Iron Barows)追落去有啲吃力，但係終點前都係趕過對方成功衛冕，取得春季天皇賞優先出賽資格，正賽應該都係佢擺下擂台；「鐵甲巴魯」沿途都係有少少留唔住，不過跑大長途證明晒比大家睇唔係冇得爭，直路上一度突圍只係最後幾步不敵「緣厚情摯」，如果跑春季天皇賞都會係邊線份子。至於Machaon d’Or呢匹質新氣袋今場換吉田隼人跑，沿途留得太後，成日都話跑阪神內彎留後跑係死路一條，直路埋唔到前面身都算，追嚟追去連隻Silver Sonic都過唔到結果只得第4，嚟緊決定跑春季天皇賞，到時擺返前少少跑表現可以再好啲。
https://www.youtube.com/watch?v=-QC0DaRsJp4

中山就有1800米二級賽春季錦標，上次出戰共同通信盃以冷門身份跑入一席第3嘅Be Astonished今場繼續爭皐月賞入場劵，岩田康誠用返前一日騎Desierto嘅放頭步速控場，入到直路面對沿途吊住佢尾嘅Arrival狂追仍能力拒來犯一放到底，贏完今場夠錢跑晒之後皐月賞同日本打吡；阿仔岩田望來騎隻Satono Helios都唔執輸，沿途留後跑嘅佢入直路沿內欄追一段追返個第3返嚟拎走最後一席優先出賽權，知舍POG揀咗佢嘅Patrick同Roy就發達啦，皐月賞有馬加入戰團，Patrick亦都憑呢個第3執1400分喺總成績反先Ramos。
https://www.youtube.com/watch?v=y3_x67imo_s

星期一係日本公眾假期，中山舉行1800米三級賽百花盃，「薔薇一族」成員Stunning Rose上年曾經喺級際賽輸比Command Line同Serifos，呢啲績今場對返馬女都夠贏，沿途守住內欄第3位，直路移一移出去同冷門Nishino Love Wink鬥足一條直路彈甩後面馬群，最後50米先趕過對方，今場加獎金對之後爭三冠出賽位都幾有用。
https://www.youtube.com/watch?v=Q0raZvULlog

知舍POG今個星期除咗Satono Helios搶分之外就只得一匹馬勝出，星期日中山未勝利1600米賽事，Pat Tsang名下Lady Navigator之前跑4場只得3次亞軍，今場嚟到大部份都係馬女嘅場合，雖然排14檔沿途留後轉彎走大圈飛到出去八疊，但係入到直路一樣掃晒，Pat Tsang憑呢場執返520分。
https://www.youtube.com/watch?v=snja05sN21g