【連你都反底】逐天時終於贏返次

Tony

6 April 2022, 8:37:56 am

日本今個星期除咗大阪盃之外,仲有三級賽打比公爵挑戰盃。

呢場1600米三級賽喺星期六嘅中山賽事舉行,之前連贏兩場東京1600米、試過放頭入直路斜跑出去看台嘅馬女Reframe升班再跑重賞唔少人都留意跑成點,不過前面有Satono Favor後面又有「雙星相伴」(Taurus Gemini)輪流燒佢,入直路雖然冇斜跑但係就企咗喺度結果跑尾二;上年跑過NHK一哩盃同日本打吡嘅「逐天時」(Time to Heaven)近期跑得麻麻,不過今場讓磅賽揹55公斤即刻翻生,早段留到尾二輸緊9個馬位,入到直路大野拓彌拉出去嚟個大外一氣,終點前趕過「常圓滿」(Vollkommen),DMM繼「唯獨愛你」之後再出Group Winner。
https://www.youtube.com/watch?v=ymSjE0dvFHo

知舍POG今期冇人贏馬,就轉個話題講Win5。今個星期都可以話傷亡慘重,三四關出現意外賽果導致尾關大阪盃得返816注叫糊,連「樂透心」都輸埋結果得19注中「菜圃向榮」,每注派3007萬。阪神嘅3勝條件賽心齋橋錦標,前年二級賽京王盃2歲錦標亞軍「至尊王爵」(Lord Max)跑完NHK一哩盃得第5之後只出賽1場大敗而回,休息一輪跑少200米換咗松田大作上去變第10熱門,成日話阪神短直路利跟前但佢就例外,沿途喺包尾位置,入直路嚟個大外一氣追返10馬位掃晒,本來32萬注叫糊即刻得返8300注。
https://www.youtube.com/watch?v=Y-JG4QZYC4A

另一場中山3勝條件賽美浦錦標,三浦皇成騎「深紅色」(Mitono Maroon)喺前面放離七八個馬位大逃,實際放緊個唔算快嘅步速段段12秒咁跑,轉直路彎後面馬群先如夢初醒追返上去,「永恆花園」(Ever Garden)帶住主馬群追足後半程,「深紅色」入到直路上埋條斜路先腳軟先比「永恆花園」過埋,大熱門「縈繞新星」(Spiral Nova)只得第4,Win5過完呢場就得返816票過去尾關大阪盃。
https://www.youtube.com/watch?v=lBZlUxl2KW0