【轉戰歐洲】「雍容爾雅」轉到葛威法馬房攻歐洲賽事

Homan

12 May 2022, 12:46:46 pm

澳洲馬后「雍容爾雅」(Verry Elleegant)雖然於今年女皇伊利沙白錦標落第而回,但無損幕後出戰歐洲嘅決心。為左令「雍容爾雅」順利遠征,佢地決定交「雍容爾雅」於歐洲練馬師訓練。

「雍容爾雅」服役至今已贏出11場一級賽,包括考菲爾德盃及墨爾本盃等一級賽。其中兩位馬主Brae Sokolski 及Ozzie Kheir一直希望讓呢匹澳洲馬后出戰歐洲哩半大賽,以證明其實力。而且繼續留喺澳洲的話,哩半以上大賽都係讓磅賽,令佢地嘅選擇相當少。

今日佢地公布「雍容爾雅」將會交由法國練馬師葛威法(Francis-Henri Graffard)訓練,稍後將會出發前往歐洲備戰各項大賽。早前傳媒就曾經話「雍容爾雅」會以英國冠軍雌馬錦標為目標,唔知轉一轉馬房,會唔會成個計劃都有改變呢?

練馬師葛威法近年喺法國當地冒升得好快,早前已經成為阿加汗集團嘅主力練馬師。睇下今次佢可唔可以為呢匹澳洲馬后帶來歐洲嘅一級賽冠軍喇!

以往曾有「信可成真」(So You Think)由澳紐轉到歐洲服役,不過當時連馬主都轉埋,由拿督陳振南轉到古摩亞旗下。練馬師就由甘明斯轉到岳伯仁,當時「信可成真」攻下五場一級賽,包括達德素金盃兩次、日蝕大賽、愛爾蘭冠軍錦標及威爾斯親王錦標。

Source: Racing TV
Photo: Bruno Cannatelli