【跑十場】維省馬會下季於墨爾本週六賽試行日跑十場

Homan

9 June 2023 at 5:36:07 pm

香港日賽跑十場或十一場並非新鮮事，澳洲維省就算係大賽日都只會編九場賽事。但下個澳洲馬季起，當地將會喺墨爾本週六賽試行日跑十場。

維省馬會早前公布下季起，墨爾本除左三個週六賽日外，其餘週六賽日都會舉行十場賽事，意味著將會城市（metropolitan）級別嘅賽事將有所增加，整季總獎金將有所增加，但部分大賽需要減獎金，以應付新設賽事嘅獎金。

當地馬會希望藉此比一啲細馬房可以參加城市級別賽事。而額外增加嘅第十場賽事，將會係條件限制賽，例如任何練馬師於2022/23馬季少於50次在城市賽事上陣及取得少於5場城市頭馬，皆可派馬上陣這場新加的賽事，仲有其他條件限制賽事，目的希望增加呢班弱勢馬房可以爭取高獎金嘅機會。

不過騎師對有關安排似乎並不滿意，畢竟早前佢地先表達每星期都相當繁忙，尤其星期五跑完夜馬後，星期六朝就有日賽。而家仲要加多一場，佢地擔心星期六嘅開賽時間再提早，會令佢地唔可以有足夠嘅休息。如果賽會希望試行嘅話，佢地希望星期五夜晚嘅完結時間可以由晚上9:45提早至晚上8:30。

而墨爾本馬場方面就表示佢地認為可以試行日跑十場，但同時佢地都表達自己嘅憂慮。佢地擔心跑十場對跑道嘅影響。同時馬迷會喺馬場嘅時間長左，佢地需要安排相應活動回應，否則馬迷體現會受影響，這或許令佢地嘅營運成本上升。同時開賽時間都會喺佢地嘅考慮點之一，尤其冬天較早入黑，可能需要提早開賽。

加一場賽事看似簡單，但本身已經相當繁忙嘅澳洲賽馬而言，相信需要多方配合，尤其騎師近來表示希望有更多休息，或者需要賽會更多配合，令佢地更易接納新做法。

Source: Racing.com
Photo: Racing.com
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1