【賽馬傳奇】五屆冠軍練馬師簡炳墀與世長辭 享年84歲

Homan

13 February 2022, 1:53:01 am

五屆冠軍練馬師簡炳墀早前因病入院,今晨各大媒體指簡炳墀已離世,享年84歲。

綽號「簡sir」、「食力簡」嘅簡炳墀,早年曾移居英國,因緣際會下到當地學習賽馬知識。回流後申請香港賽馬會副練馬師,並於1978-79年馬季開倉從練。開初只係一個中型馬房,至1984年旗下賽駒「鐘意寶」及「金中金」連奪兩項盃賽——百週年紀念盃和百週年紀念銀瓶。而且當時其他倉主涉造馬案,唔少具質素賽駒釋出並轉到其麾下,養馬量至當時上限65匹。

及後簡sir表現越來越出色,更五奪香港冠軍練馬師,亦曾經贏得超過100場盃賽。除左冠軍練馬師之外,佢亦曾經攻下五次香港打吡大賽。在其麾下良駒輩出,如2000年香港金盃及女皇盃冠軍「實業家」、2001年香港打吡及香港金盃冠軍「實業先鋒」、1992年香港打吡冠軍「生圖」等。

2003年,佢於香港退休並獲頒終身成就獎。佢於2005年轉到澳門開倉練馬至2011/12馬季。當時佢因賄選罪成入獄而需放棄練馬師牌照。簡sir於港澳兩地馬圈極具影響力,亦有唔少練馬師都係師承呢位華人傳奇。香港練馬師葉楚航、徐雨石及丁冠豪;澳門則有馮耀正及張兆煊都係簡sir徒弟。

媒體就指簡sir於家人陪同下離世,希望佢一路好走,家人節哀順變。

Photo: HKJC (截取自2008年訪問)