【謙信公統一越後國】

Tony

今個星期日本戰報,會講下兩場泥地級際賽同札幌日經公開賽。

講今期3場之前先講騎師消息,除咗藤田菜七子生日有馬贏之外,就係武豊又破紀錄,佢喺星期日札幌嘅第7場賽事憑馬女Delamotte贏得第4200場中央頭馬。

星期六嘅札幌日經公開賽成為咗「里見皇冠」半妹Pont Des Arts嘅表演賽,一路守住生位,就算Naimama中段踩油搏走甩都好,轉彎都已經捉到晒,入到直路擺正堂軚就彈甩後面4個馬位,破埋場地紀錄時間取勝,贏得Very Easy。佢跑2600米就不敗,不過上去跑Group Race就唔多夠班,嚟緊丹頂錦標應該又到掘金時間;跟佢後面嘅「石灰岩谷」(Bozzhira)就大鑊啦,先唔好講佢望空大半程,武豊見李慕華對面直路郁手自己都仲淡定慢慢騎,最後400米起碼輸緊五六個馬位,條直路咁短點追呀?結果追返個第2過咗Naimama,輸緊4個馬位都幾明顯係人棄我取。至於一對3歲馬,上個禮拜提過嘅Hygge,本來佢個位先過「石灰岩谷」,點知留下留下越留越後,死得啦!結果就跑個全無威脅嘅第5,嚟緊預賽再留意過;至於上次贏2勝條件賽嘅地方馬Shimbo,轉彎就踩油已經用晒力,最終就對手腳軟自己都腳軟,第3都拎唔到。道營就同意比佢跑菊花賞預賽,唯有寄望預賽有三甲拎出賽權,唔係就諗方法移籍中央出賽啦。

星期日兩場泥地三級賽,先講札幌嘅榆樹錦標,2歲一級賽希望錦標盟主Time Flyer沉寂多時,上場終於喺函館贏返一場;今場排13檔起步一早喺外疊跑唔使塞車,入到直路就控制大局,呢場頭馬就手到拿來;不過跑第2嘅Westerlund跑法都值得一講,起步Drop後比馬群拋甩,去到對面直路就踩油六疊轉彎,遮住藤岡佑介個名仲以為騎果個係田泰安嚟。

新潟嘅獵豹錦標,以越後之虎上杉謙信改名嘅Kenshinko,嚟到「主場」就醒神,比佢放到頭控制步速,丸山元氣轉彎再放一段彈甩對手,去到終點前再望埋後面睇對手追到嚟未,都係追唔到,咁就破埋場地紀錄時間贏出呢場三級賽。留意返落雨泥地不利後追,搞到Miyaji Kokuo同埋Blank Cheque追足一條直路都係埋唔到Kenshinko身。

Photo: Netkeiba
重溫:
https://www.youtube.com/watch?v=Vc7P4r7oYnw
https://www.youtube.com/watch?v=fZJWkgpK36s
https://www.youtube.com/watch?v=OCGHHFIc7dI