【請搵出比金鎗六十更唔穩嘅熱門馬】

Tony

睇完「金鎗六十」贏打吡,就睇埋呢三日嘅日本賽事啦!

今個星期係日本嘅春分假期,所以連跑三日馬。

星期五中山就有1800m三級賽百花盃,早段放得幾快嘅情況之下就益咗守第2位嘅冷門Ablaze喺直路上出頭頂到返終點,藤井勘一郎終於贏出第一場級際賽。希威森座騎Red le Reve一直留後轉彎就走都係追唔切跑第2,大熱嘅Season's Gift只得第3。Ablaze之後可能會跑櫻花賞或者橡樹,同家族出過二級賽冠軍「始創先鋒」(Trailblazer),跑2400m長力方面應該不成問題,隨時會有驚喜表現。

星期六阪神2000m表列賽若葉錦標,上次京都新馬賽輕鬆取勝、身價5億8千萬日圓嘅Admire Virgo (見19/1/2020報導),今場縱使遇上超快步速嘅情況之下一樣冇有怕,最後100m先過咗全程大逃嘅Chimera Verite,兩隻馬一齊拎皐月賞入場劵。賽後友道康夫就話隻馬會同馬主決定會唔會跑皐月賞,如果唔跑就有可能留返打吡先見到佢。不過論質素同表現,Admire Virgo似乎比同馬房嘅My Rhapsody高好多,今場Admire Virgo一騎落去啲加速力就比到你睇係清脆利落,反觀My Rhapsody場共同通信盃全程馬王級跑法入到直路就企咗喺度,隻馬轉咗歲唔覺有進步。武豊今年亦都好大機會揀錯馬跑三冠──定係為咗凱旋門有得騎「日出之國」而焗住揀錯馬,就不得而知。

跟住就返到打吡之前兩個鐘睇阪神大賞典,川田將雅騎「神業」可以錯嘅嘢全部錯晒,起步大漏閘不特止仲要走返上前面守三疊望空,入到直路就企咗喺度!難怪角居勝彥發晒火話完全接受唔到,跑唔跑春季天皇賞都唔知啦!結果「笑一笑」(You Can Smile)再次證明跑大長途表現一流,入直路等到內欄空位衝上嚟就贏出呢場3000m二級賽取得春季天皇賞優先出賽權。今場4隻4歲馬,Tosen Cambina最後搶返個第2,至於Meisho Tengen入直路走外疊用多腳程就跑第3,去到春季天皇賞仍然可以留意。「山茶花」(Melody Lane)今場越級挑戰就搽咗上前面跑第5,賽後表示會跑春季天皇賞,睇下有冇奇蹟啦。反而「石灰岩谷」(Bozzhira)表現失望,入彎比「萬分感謝」(Muito Obrigado)頂出去望空應該有影響,但今場輸唔遠反映未至於冇3000m氣量,如果仲跑春季天皇賞應該冇乜問題。

最後就到中山嘅1800m二級賽春季錦標,今場三甲拎皐月賞入場劵。希威森今場憑Galore Creek贏出客串期內第一場級際賽,不過日本唔興嘅開跑前落飛就罕有咁喺呢度發生,最後2分鐘由35倍打到落16倍開跑,有人睇嚟賺到盆滿缽滿啦!賽後希威森接受訪問話皐月賞會夥拍Galore Creek上陣。希望錦標亞軍Weltreisende都跑得唔錯啦,不過係估唔到今場有伏兵結果又第2。反觀Succession個第3就好驚險啦,留得後過Galore Creek轉彎唔跟住佢尾,反而係飛到出6疊入彎,用完度力就比人彈甩嘅情況之下先影贏,又一次睇到三浦皇成誤判啦,影贏個第3係你好彩咋。

Photo: Netkeiba

重溫:
https://www.youtube.com/watch?v=JN-Yt_rQ5q4
https://www.youtube.com/watch?v=hqmb9Za_kb4
https://www.youtube.com/watch?v=xHUl0A9kXBs
https://www.youtube.com/watch?v=lln8hpKIA3I