【覺士盾前瞻】「品德高尚」非一面倒熱門 僅餘九駒角逐

Homan

22 October 2021, 4:47:40 am

聽日滿利谷馬場將會上演一級賽覺士盾,原有十駒報名,但賽前Gold Trip因未能通過獸醫檢查,被逼退出。

眾人焦點一定係抵澳後五奪級際賽冠軍嘅「品德高尚」(Zaaki)。但上場考菲爾德錦標慘遭滑鐵盧,今場未被大幅睇好,僅為3倍大熱門,雖知道佢近兩場都係1.4倍樓下嘅全熱門。「品德高尚」上仗應付考菲爾德嘅急彎似乎有啲困難,睇下今仗與麥道朗故劍重逢能否為佢贏得呢項一級賽喇!

與「品德高尚」同屬凌靄琛(Annabel Neasham)馬房嘅「至寶」(Mo'unga),今場搵到布文策騎。雲絲仙子錦標冠軍「至寶」上仗於葉森讓賽落敗,今場第二次增至2000米路程上陣。上次出戰2000米為今年嘅女皇伊利沙白二世錦標,最終包尾而回。睇下今次表現又如何喇!

兩匹年長雌馬「雍容爾雅」(Verry Elleegant)及「投機法寶」(Probabeel)都於陣中,前者由連達文策騎,而後者由柏寶執韁。「雍容爾雅」上仗於東寶錦標只得殿軍,表現不似如期。今仗要變身似乎唔容易。而「投機法寶」上仗於終點前力壓Nonconformist贏得考菲爾德錦標冠軍,上屆因軟地而只得第七名,預計聽日為好地,狀態正好要再進一步亦非不可能。

最後新科考菲爾德堅尼冠軍「愛禮物」(Anamoe),呢匹3歲馬今年表現持續進步。賽事早段往往慢腳,而末段都可以交出強橫後勁。今次增程屬合理之舉,當然首次對陣年長馬為其極大考驗,皆因上一匹三歲覺士盾頭馬已經要數到2013年嘅「夏姆斯獎」(Shamus Award),再數就係2009年嘅「信可成真」(So You Think)。另外,「愛禮物」馬主賽馬集團高多芬從未贏過覺士盾,如能憑此三歲馬攻下覺士盾,相信可成一時佳話。

Source: Racenet
Photo: Grant Peter