【衝出世界】神聖之力贏完大長途有大想頭

Tony

8 December 2021, 6:21:35 am

睇完日本冠軍盃,又返去睇星期六兩場重賞。

星期六中山先舉行3600米二級賽長途馬錦標,賽前冇咗上屆冠軍「壯偉萬島」(Ocea Great)令形勢更見混亂,結果2匹先前轉播賽日跑過條件賽嘅馬包辦一Q,5月贏出3勝條件賽升班嘅「鐵甲巴魯」(Iron Barows)跑咗頭1000米之後見前面放咁慢不如自己控制大局,幾乎放足後面2600米,只係臨完場先頂唔住「神聖之力」(Divine Force),上場跑古都錦標比Tony評價唔岩跑阪神短直路跑中山會好啲,果然今場換上田邊裕信發揮恰到好處,轉彎仲有600米開始踩油爆一段34秒6趕過對手,最後50米岩岩好過埋「鐵甲巴魯」,越級挑戰成功。賽後練馬師寺島良好大想頭,話幫「神聖之力」報名跑沙特盃賽日場3000米三級賽紅海草地讓賽;不過之後講返大目標係春季天皇賞,跑阪神短直路難咗啲喎。
https://www.youtube.com/watch?v=RUxJ8HdHOl4

另一場2000米三級賽挑戰盃,兩匹名氣3歲馬同場作賽,上年贏新馬賽但係涉及禁藥事件取消資格嘅So Valiant上場聖烈特紀念跑第2之後唔跑菊花賞,留到今場復出,11檔一起步就跟住第2位,入直路一騎就彈甩對手贏3個半馬位,下年大阪盃可以圈定一隻先。三連勝升公開班嘅「吉典娜」(Geraldina)今場起步沿途守內欄後列八九位,入到直路追咗一段仔結果跑第4,可以留返下年繼續留意。
https://www.youtube.com/watch?v=5HtdgGTrUws

跟進馬方面,就可以講下上次女皇盃轉播日跑2勝條件賽輸咗嘅「譽盛榮揚」(Honneur),岩田望來上場搏失全場一齊起勢插佢,今場縮返去1800米用返川田將雅,沿途守住第6位生位,入直路一推騎落去好好反應彈甩對手勝出。
https://www.youtube.com/watch?v=iuXoY1JA4jQ