【董事話事】馬會修章 練馬師養馬數目上限由董事局酌情決定

Homan

6 January 2023 at 3:56:44 pm

香港賽馬會今日增補練馬師養馬數目嘅董事局指示及賽事規例中關於賽馬團體嘅部分。

開始講之前先講解董事局指示同賽事規例嘅分別。賽事規例係所有關於賽事嘅規例，包括大至馬主、練馬師及騎師、小至綵衣同賽事中平頭如何處理等都會包括在內。賽事規例合共有172條，當然都會有涵蓋唔到嘅地方。而董事局指示就係補足遺留嘅部分，並與賽事規例有同等效力。例如練馬師及騎師如何請假都會喺董事局指示可以搵到。

今次馬會兩個地方都有修訂，喺董事局指示入面嘅練馬師養馬數目中，董事決定不再為練馬師養馬數目明文設限，以往限制只有沙田馬房嘅練馬師養馬數目為60匹、同時擁有沙田及從化為70匹。現時董事局指示為董事局會不時酌情決定練馬師養馬數目，而幾時先計算入口馬到練馬師嘅養馬數字，亦由董事局不時決定。換句話講，董事局可以隨時運用酌情權決定練馬師養得多啲定少啲馬。究竟咩情況下可以運用到呢個酌情權呢？至於幾時會有第一個會用到呢個條款嘅情況，亦都相當令人好奇。

而關於賽馬團體嘅修訂就係每位會員最多可以以個人、合夥或賽馬團體經理人身份嘅養馬數目由四匹升至五匹，會員作為賽馬團體成員就唔計。另外，每位會員可以參加賽馬團體嘅數目由三個升至四個，經理人及普通成員皆計算在內。此舉無疑可能參與開嘅會員多左成為馬主嘅機會，睇下呢個做法會唔會可以吸引呢批養開馬嘅會員會唔會可以為香港馬圈帶來更多新血。


Source: HKJC
Photo: HKJC

==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1