【菱鑽系金盃先拔頭籌 安田隆行年尾贏到年頭】

Tony

日本新馬季第一日,同大家報導兩場金盃同萬葉錦標。

首先係全年第一場級際賽中山金盃,呢場三級賽近年冠軍之後大多成材,例如「朗日清天」同「勝出光采」及後贏出一級賽;好多年未贏過級際賽嘅老牌馬主菱鑽系,踏入2021年即刻喺級際賽有斬獲,就係連贏2場上公開班嘅Hishi Iguazu,今場見松山弘平一早走好位,入到直路步步壓住「心裡燈」(Kokorono Todai)嚟跑,造出3連勝。今場3匹4歲馬除咗「心裡燈」之外,「緣厚情摰」(Deep Bond)同「有情莊園」(Darlington Hall)都跑到報失,呢批4歲馬水準係點真係要重新考量下。
https://www.youtube.com/watch?v=uZcxmPq6rA4

另一場今年轉去中京舉行嘅三級賽京都金盃,安田隆行馬房由上年年尾Danon the Kid贏完希望錦標到年頭再贏三級賽,前年跑NHK一哩盃不敵「頌讚火星」得亞軍嘅Cadence Call沈咗近兩年終於翻生,岩田康誠喺直路頭比對手夾到抽起再Pick Up返上嚟控制大局,後面「和平樂園」(Peace One Paradis)追極都埋唔到身。Cadence Call同「和平樂園」都係長期跑左轉嘅馬,嚟緊安田紀念見到呢隻兩隻有份跑都可以留意埋,分分鐘有驚喜。
https://www.youtube.com/watch?v=xo1Kb67JRTs

最後就係跑呢兩場之前嘅公開賽萬葉錦標,今場可以比大家睇下日本大長途馬啲斷層同香港中長距離馬嘅斷層冇分別,見慣見熟而大賽無表現者加上不明物體,就此包辦三甲;Namura Donovan由9日前仲係跑緊3勝條件賽,到9日後越級挑戰負輕磅上陣,再趁今場前面開個快步速,自己施施然咁留後,入直路爆一段彈甩對手,「靈鳳韻事」(Reiho Romance)終點前趕過「大成足跡」(Taisei Trail)得亞軍;,至於大熱「超強引力」(Black Hole)去咗邊?今場就比快步速玩死,入到直路就企咗喺度。
https://www.youtube.com/watch?v=yRw6V3Hjve4

Photo: Netkeiba