【莎貝寶駒仔贏G3 日經賞三甲天春再鬥過】

Tony

31 March 2020, 10:10:45 am

今個星期日本除咗高松宮紀念之外仲有三場級際賽,即刻去睇!

星期六嘅阪神就有三級賽每日盃,希威森今場騎Al Jannah視Satono Impresa為假想敵冇錯嘅,入直路就封住個位唔比Satono Impresa出嚟,但係武豊就話塞車唔使驚,最後二百等到門一開就騎上嚟過咗Al Jannah取勝,兩隻馬彈甩後面第3嘅Danon Aller。Satono Impresa阿媽係三屆一級賽太陽戰車錦標冠軍、2010年香港一哩錦標季軍「莎貝寶駒」(Sahpresa),退役之後運去日本配種,今次係佢第一匹子嗣贏出級際賽。縱使係3戰全勝,今場仲要係增程跑1800m贏埋,呢隻馬血統始終都係適合跑一哩,同主Satono Flag就向三冠出發,佢縮返落去跑NHK一哩盃可能有著數。

中山就有日經賞,「覓奇燕子」贏咗呢場二級賽取得優先出賽權,不過喺終點前阻到Mozu Bello,橫山典弘要停2日;Mozu Bello比人阻完之後冇乜點騎過,僅僅贏「三幕劇」一條頸位跑第2,唔比人阻可能威脅仲大啲添。今場三甲之後都會出戰春季天皇賞,不過Mozu Bello幕後野心大,下半年目標係跑墨爾本盃,到時澳洲果邊有得跑先算啦。其他馬都彈甩好遠,「振奮士氣」呢隻1勝馬又比各位假希望啦,直路頭係威係勢仲以為贏得,點知最後連獎金都冇,正賽唔使再睇啦。

星期日中山跑完2場賽事之後腰斬,第3場之後賽事留返今日先跑。新騎師小林脩斗喺第4場賽事中撞到前駒墮馬,佢送往醫院檢查之後證實頭部外傷、扭傷頸同流鼻血,不過冇骨折。但係佢因為不小心策騎罰款5萬元;重頭戲係三級賽三月錦標,Suave Aramis同「關鍵一擊」鬥足一條直路,結果都係擺前走嘅Suave Aramis贏。「關鍵一擊」轉咗跑泥地表現好咗好多,不過連續兩場都係衰留得太後,轉彎就踩油直路追極都係過唔到一早望空嘅Suave Aramis。當然以「關鍵一擊」嘅級數,佢之後跑泥地可以繼續留意。

Photo: Netkeiba

重播:
https://www.youtube.com/watch?v=24xKgfr8H7o
https://www.youtube.com/watch?v=xCrGQJnsB6o
https://www.youtube.com/watch?v=omzi_pv2qrw