【肯塔基打吡冠軍 Medina Spirit 被驗出禁藥】

鹿

9 May 2021 at 7:03:13 pm

又係你呀巴生？

練馬師巴富達再次捲入禁藥風波，旗下訓練 Medina Spirit 上星期捧走肯塔基打吡，但賽後被驗出違禁藥物 Betamethasone (一種類固醇，可用作醫治發炎引起的皮膚病) 超標。巴富達星期日於邱吉爾園開記者會，指自己從未於 Medina Spirit 身上用過相關違禁物，幕後團隊將會全力配合調查，亦會將相關樣本再做化驗。之後再輪到邱吉爾園當局出新聞稿，即時禁止巴富達旗下馬匹於當地上陣，而 Medina Spirit 頭馬資格就要等進一步調查及化驗結果再作決定。

巴富達上年至少有三匹旗下賽駒捲入禁藥風波，當中以兩匹一級賽冠軍 Charlatan、Gamine 被取消資格最為矚目，再追溯至三年前三冠王 Justify 亦有禁藥事件，今次更加發生於打吡盟主身上，相信又會掀起大幅討論。

(Photo: BloodHorse)