【耀滿瓶戰舞者分途出擊贏G2】

Tony

今個星期日本冇一級賽,不過有三場級際賽可以同大家一齊睇。

星期六東京先上演2歲三級賽沙地阿拉伯皇家盃,呢場近年成為名駒考牌賽,好似「猛攻」(Brave Smash)、「野田優驥」(Danon Premium)、「放聲歡呼」(Gran Alegria)都贏過,上年就係「戰舞者」(Salios)贏出。今年雨中開跑就合晒「緬甸皇城」(Bago)子嗣合尺,留意隻Stella Veloce,睇橫山典弘點樣留到落包尾,再抄出大外檔三兩個箭步就過晒對手,嚟緊朝日盃可以先圈定一隻。
https://www.youtube.com/watch?v=honqUHx_0Ms

星期日兩場二級賽,先講京都大賞典,結果一對曾經跑過香港瓶嘅馬包Q。「耀滿瓶」贏完香港瓶之後事隔10個月終於贏返場,川田將雅正常發揮就應份贏嘅,不過隻馬直路出腳就有疑問啦,直路中間係有試過左腳轉正腳內閃一下,唔到兩秒又轉返左腳過終點,似乎唔係咁好喎。賽後絲綢會米本先生就話日本盃同香港瓶二揀一,到時再留意過;反觀「神業」贏完菊花賞三年冇贏過,今場起步慢閘再留後爆一段都係贏唔到,仲有乜嘢辦法幫佢贏到呢?下場跑秋季天皇賞,睇怕都唔會輪到佢贏。
https://www.youtube.com/watch?v=6AL_BaHH82Y

另一場係每日王冠,「戰舞者」縮返落1800今場終於修成正果,入直路見李慕華冇乜點騎過就自動波行過對手,下場跑咩呀?絲綢會米本先生繼續講,話堀生認為2000米嫌長,因此將目標推去一哩冠軍賽同香港一哩錦標,對完「放聲歡呼」再對「金鎗六十」,嚟緊年尾一哩戰線將會相當精彩,唔好行開!「里見名言」(Satono Impresa)今場起步慢閘就報失咗,不過菊花賞報名名單又見到佢個名,賽後練馬師矢作芳人就話睇隻馬狀態而決定跑唔跑菊花賞,係人都睇到為咗幫「鐵鳥翱天」完成三冠,馬主同練馬師有馬都諗住派出嚟抬轎,唔比啲條件馬上去玩啦!先有「真理狂想」(Chimera Verite),再有「里見名言」,暫時6隻2勝條件賽頭馬得4隻可以出賽,仲唔係計到盡?
https://www.youtube.com/watch?v=yPyYnnV3f20

Photo: Netkeiba