【緣厚情摯大勝一場 皐月賞5張入場劵公佈】

Tony

22 March 2021 at 4:18:03 pm

睇完「將王」點輸香港打吡，就嚟睇下今個星期日本賽事，大賽前預賽連場！

首先係星期六早場中京三級賽獵鷹錦標，朝日盃未來錦標得主Grenadier Guards揀喺今場復出，諗住對手偏弱就贏硬呀？未必！全程一路拍住新山紀念亞軍Rooks Nest嚟跑，但係比足一條直路都過唔到Rooks Nest不特止，終點前叮噹馬頭影輸埋添。Grenadier Guards嚟緊會跑NHK一哩盃，今場表現可以收貨；至於Rooks Nest今場贏完，下場都係以NHK一哩盃做目標，到時睇下Grenadier Guards可唔可以復仇成功。
https://www.youtube.com/watch?v=vohSIszFN9A

另一場早場中山三級賽百花盃，繼續都係擺前走有著數，1月出戰仙女錦標不敵Fine Rouge得亞軍嘅Ho O Ixelles今場增程，起步搵到條欄守好位等到入直路就走得快好世界，大熱嘅Uberleben留後轉直路彎走到七疊，加埋落後唔知幾多個馬位，結果埋唔到Ho O Ixelles身之餘，終點前差一步都過唔到Enthusiasm只得季軍。
https://www.youtube.com/watch?v=XBZ6eoImD4g

星期日重頭戲就有阪神大賞典，武豊星期六賽事中受傷，結果「笑一笑」(You Can Smile)換上藤岡佑介上陣；星期六嘅阪神賽事都係多雲無雨，嚟到星期日比賽就雨中上演，「大哲學家」(Aristoteles)以菊花賞亞軍、新勝美國賽馬會盃身份出戰呢場二級賽，捧成1.3倍大熱唔意外，但係落住雨跑3000米就有啲力不從心，入到直路就企咗喺度；相反同為4歲嘅「緣厚情摯」(Deep Bond)就發揮本色，入直路個個以為係「白大兄」(Shironii)表演賽，但係「緣厚情摯」三兩步就輕鬆趕過直奔終點，大勝5個馬位而回，取得春季天皇賞優先出賽資格，「笑一笑」同Namura Donovan後上不及分列亞季。「緣厚情摯」上年比人戲稱「鐵鳥翱天」護航馬，今次贏到二級賽可以話充分發揮氣袋性能，前田家睇嚟放心靠呢隻馬爭個春季天皇賞返嚟啦。
https://www.youtube.com/watch?v=BqoidpHq31c

呢個禮拜松山弘平成為最大贏家，兩日加埋贏咗11場頭馬，其中包括星期六嘅皐月賞預賽若葉錦標，佢騎Admire Hadar沿途守住三四位，入到直路輕輕騎幾步就控制大局，幫隻馬取得皐月賞優先出賽資格，而Chevalier Rose就力壓「御林園」(Studley)取得另一個出賽資格。
https://www.youtube.com/watch?v=EUTMHQxvvSw

另一場皐月賞預賽春季錦標，話題馬Land of Liberty又一次交比三浦皇成騎，結果又一次出醜人前，早段隻馬又喺度搶口想留都留唔到，之後由得隻馬順走，但係入直路無以為繼，睇怕都係技止於此；相反Asamano Itazura今場嶋田純次發揮可以話超水準，轉彎踩咗一段油趕過Land of Liberty以為呢場頭馬已經到手，點知數漏留得仲後過佢嘅共同通信盃亞軍Victipharus，池添謙一入到直路拉隻馬出啤酒園大外一氣，終點前岩岩趕過Asamano Itazura，池添兄弟檔呢個組合亦首度贏出級際賽，兩駒連同Boden一齊取得皐月賞出賽資格。
https://www.youtube.com/watch?v=DYwEz5z4yPc

精選條件賽系列就有戴孝馬威力驚人又一例證，礦系馬主岡田繁幸星期五逝世，星期六中山跳欄賽飛馬錦標就有兩隻名下馬參賽，包括岡田個人名下嘅「信託」(Trust)同一口馬「醒獅王」(Meiner Leone)，結果「信託」喺直路先擺脫跟咗大半程嘅「夢飛翔」(Masahaya Dream)糾纏，「醒獅王」直路上再趕過「信託」取勝。兩駒最終一Q返，可以慰馬主在天之靈啦。
https://www.youtube.com/watch?v=-KbaZXXVGHU

另一場阪神嘅2600米2勝條件賽，屢拼不勝嘅「神聖之力」(Divine Force)結果都係返到阪神先再開勝門，喺前面有馬狂放嘅情況下留到包尾梗係著數，直路上好似裝咗摩打咁彈甩對手贏馬升班，仲打破埋「山茶花」(Melody Lane)保持嘅2600米紀錄時間。
https://www.youtube.com/watch?v=e5jIGKjHByU

Photo: Netkeiba