Homan

30 August 2021 at 12:29:02 pm

四位澳洲騎師上星期因於Airbnb派對而被罰停賽三個月（相關報導：https://bit.ly/3mL6ZyI）。

及後維省馬會發現原來騎師薛凱華亦有參與派對，結果騎師薛凱華亦要停賽三個月。現時有五位騎師因Airbnb派對而缺席維省春季嘉年華賽期，而新南威爾斯騎師今個春季要前往維省策騎幾乎不可能，早前薄奇能曾嘗試，但最終失敗告終。結果多匹出戰維省春季嘉年華賽期機會馬都需換上其他騎師。

上星期就有柏寶臨危受命策Behemoth攻下文西錦標，贏得回澳策騎後既第一場一級賽。不過Behemoth幕後公布，該駒下仗起將會交回韋紀力策騎，畢竟當初因為韋紀力棄騎先會落到賈傑美手中。不過柏寶出色既表現，已經為佢贏得Incentivise既帥權，呢匹吸引薄奇能特登寧願隔離14日，都從新南威爾斯前往維省既賽駒，柏寶將會主理其春季嘉年華賽事。近日親試後，柏寶直指該駒有一級賽賽駒水準，且看之後轉播賽可唔可以見到佢揚威喇！

而原定由薛凱華策騎出戰覺士盾既「雍容爾雅」（Verry Elleegant），因薛凱華停賽而轉由連達文策騎。幕後表示雖然薛凱華停賽未能上陣，但今次易配佢地並無損失，並認為連達文於澳洲騎功出色，相信可以為佢地帶黎頭馬！

Source: Racenet; Racing.com
Photo: Reg Ryan–Racing Photos via Getty Images