【經典盃報名】經典一哩賽冠亞軍在陣 其他馬今次埋唔埋到身?

Homan

15 February 2022, 4:10:21 am

經典盃報名馬名單琴日公布,一共有17匹名報名,最高分報名馬101分,最低則66分。

兩匹101分馬就係今年經典一哩賽冠、亞軍——「浪漫勇士」及「加州星球」。兩駒上次拋離第三嘅「包裝智威」近兩個馬位。「浪漫勇士」預計會繼續交由田泰安執韁,挑戰六連捷並延續四歲三冠挑戰權。而「加州星球」就如無意外會由潘頓執韁上陣。

經典一哩賽季、殿軍——「包裝智威」及「都靈太陽」都會出戰,前者上仗繼續交出穩定末段,紙上血統明顯越長越好,多二百會跑成點呢?而「都靈太陽」上仗周俊樂阻到人之後衝入第四,經典盃預計交比巴度攻堅,會唔會有進一步表現?

新加入對手方面,莫雷拉揀騎「多巴先生」上陣,該駒早前避戰1600米經典一哩賽,初三賽日又曾因不良於行退出。之後操練一直正常,莫雷拉就話「多巴先生」狀態未係最好,但認同此駒質素好。

而賀賢馬房嘅「旭日昇」經典一哩賽前因敗於「醉眼光」,未能出戰經典一哩賽。而早前又敗於「跨渡口」,今仗適逢低分馬較多,預計佢就算得80分都可以輕鬆入選。「幸福至上」上仗谷草大熱倒灶,回師田草出戰經典盃機會又點呢?

若單以評分睇而又冇馬退出,「龍船狀元」、「多多勇駒」及「飛天神駒」將唔會入選。而優先出戰馬名單或於本星期公布。

Source: HKJC
Photo: HKJC