【紅色創世馬事之王分途搶得打吡入場劵】

Tony

11 May 2021 at 6:20:35 am

今年日本打吡最後嘅入場劵公佈！

星期六先有二級賽京都新聞杯，呢場唔係指定預賽不過對加獎金就好有幫助。友道康夫馬房出一對，Tony跟進開嘅良血馬Lupercalia今場採取快放戰略，結果擺脫到對手偏偏就擺脫唔到自己友，放足2000都要比廐侶Red Genesis冚；後駒見川田將雅由800米處開始騎，到終點前生擒自己友，除咗幫友道贏出第600場頭馬，川田亦贏出第1600場頭馬。賽後友道話Red Genesis好大機會出戰打吡，而Lupercalia呢場用得多咗，打算留返秋季先用就未必跑打吡。
https://www.youtube.com/watch?v=MjPkHTw_qqs

同日另一場表列賽主角錦標，14隻馬爭最後一張打吡入場劵，李慕華近排差唔多騎乜都大熱，今場揀騎京成杯第4名Weiss Meteor上陣，結果一個起步慢閘就玩完，後追不及只得第4；反而沿途守住第2位嘅Baji O入直路輕鬆趕過對手，全程未受太大考驗之下成功出線。
https://www.youtube.com/watch?v=k9BqibU_akQ

星期日就有新潟大賞典，橫山典弘自殺式快放「個人特色」(My Style)值得大家一睇再睇，放完頭1000米57秒1，跟住入到直路頭收工；呢個估大家唔到嘅亡命步速搞到入直路一輪混戰，結果全程留後、跑親重賞得個近字嘅Sanrei Pocket成功執死雞，力壓Potager同「里見飛躍」(Satono Saltus)首度贏得三級賽。至於今個星期喺新潟贏得第1000場頭馬吉田隼人，今場就騎之前贏過三級賽嘅良血馬Boccherini上陣，騎就本身冇騎錯，衰在排1檔+重磅+長直路，乜嘢不利條件都齊晒，難怪喺直路比人任過啦！
https://www.youtube.com/watch?v=47kZ4yzYZPY

最後就有短途公開賽鞍馬錦標，上年高松宮紀念勝後被貶嘅「超神建築」(Kurino Gaudi)之後跑極都贏唔到結果今年高松宮都冇得跑，今場再嚟失意地換上停賽復出嘅岩田康誠上陣，結果全程走四疊，入到直路一路打左手鞭一路斜跑都贏到同場弱旅，取得生涯第2勝，唔知嚟緊短途馬錦標會唔會再見到佢呢？
https://www.youtube.com/watch?v=Rz18l37NP0o