【約定再見】莫雷拉表示來年再到澳洲客串

Tony

21 April 2023 at 5:25:38 am

巴西騎師莫雷拉季初因傷離開香港後，回到家鄉巴西策騎，並表示開始其世界巡迴策騎告別之旅。

自上月底起，莫雷拉就喺澳洲作短期客串，於The Championship Day攞到相當唔錯嘅成績，包括策騎華禮納馬房嘅Militarize贏得澳洲賽馬會育馬錦標及香檳錦標兩項一級賽，喺當地暫時取得7場頭馬。

佢接受當地傳媒時就表示自己三星期內就會完成今次澳洲客串之旅，之後番到巴西後會繼續策騎，希望來年再次到澳洲客串。佢盛讚澳洲係一個好好嘅國家，仲話要即時諗個澳洲唔好嘅地方係相當困難。佢亦都藉著今次客串，去左悉尼唔同景點觀光，甚至入場睇當地嘅欖球同足球賽事。

主持就問佢有冇諗法長期留喺澳洲，佢就話呢個會係一個家庭決定，需要同屋企人商量一下。同時佢都會喺今次完成客串後，返到巴西後再同老婆同小朋友傾下，睇下佢地有冇興趣過黎生活，甚至下年返黎客串嘅時候帶埋佢地黎澳洲感受下。不過佢就話唔咁快落決定，始終呢個係一個重大決定，需要小心考慮。

雖然只喺黎左幾個星期，但始終莫雷拉都係世界知名騎師之一，唔少澳洲嘅見習生都會向佢請教，而佢都好樂意將佢知嘅傳授比佢地。佢就話無人一出世就知道所有野，對於佢地不恥下問感到敬佩。

莫雷拉上年暑假指自己臀部有傷，並表示自己曾到中文大學醫院就醫，並以注射高濃度血小板血漿（PRP）治療。當時指佢需要休養一段長時間至可以復出策騎，該治療方式可以減輕痛楚，但並不可能令佢全康復，只係令佢稍為延長策騎生涯。至11月底，佢決定放棄香港賽馬會公司騎師牌照，並開始其世界巡迴策騎告別之旅。佢當時表示會視乎自己臀部嘅痛楚再決定幾時退役。開始時，預計自己只會騎多半年至一年，但近日喺中東時佢表示自己會騎多一年至年半先會退休。至於佢幾時會真正退休，睇黎都要睇下佢個臀部生唔生性喇。

莫雷拉將會喺今個星期六喺鶴斯百里（Hawkesbury）上陣，睇下佢會唔會繼續有頭馬進帳喇！

Source: Racenet
Photo: Racenet
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1