【知舍POG連中三元】大船細船輪流贏呀!

Tony

1 June 2022, 8:51:57 am

睇完日本打吡大賽,繼續睇葵錦標同目黑紀念。

星期六中京舉行1200米三級賽葵錦標,全場收得最多獎金嘅Win Marvel上場贏完橘錦標,今場跑少200米仲要揹57公斤都一樣冇問題,跟住個第7位跟住堆電兔走,入直路個個停晒就自動波衝上嚟,掟甩後面對手勝出。留意吓呢隻馬進度,話唔定遲啲跑短途馬錦標會見到佢。
https://www.youtube.com/watch?v=H_SvjfEEVbs

星期日跑完打吡仲有場讓磅二級賽目黑紀念,良血馬Boccherini今年回勇,連續兩場係中山出戰二級賽入位,今場揹到全場最重57.5公斤上陣,一路跟住上年冠軍「滿謝意」(Win Kiitos)跑,最後200米先趕過對方,繼前年中日新聞盃之後再取得勝仗。呢隻Boccherini同佢全兄「朗日清天」(Lovely Day)一樣,中年先嚟大爆發,阿哥5歲年贏兩場一級賽,呢個細佬6歲又得唔得呢?之後見佢跑一級賽可以留意。
https://www.youtube.com/watch?v=dr3Wvv3gFo0

知舍POG星期六三場有馬出就贏晒三場,打頭陣嘅係中京未勝利2200米,大船之一、Sunday會一口375萬*40口嘅Dean's Lister本來上年11月出道,點知試完閘就傷咗搞到而家先初出,比著正常POG比賽係打吡當日完幾乎可以話得物無所用,不過第一屆比賽計到菊花賞,而家初出搶分都未遲,擺咗坂井瑠星上去,起步係慢咗少少,跑到半路已經要推,不過入直路拍住絲綢會一口馬Livia就步步head住過終點,彈甩後面對手,幫Edward Chan、Dicky、Tony、KC同Ramos賺520分。其實隻馬今場未算準備十足,但係一樣贏到,即係話你知佢呢組都幾廢,不過隻馬早段有少少跟唔住,似乎再跑長啲上埋菊花賞都有得諗。
https://www.youtube.com/watch?v=zthJ_zB1VOE

跟住就去睇東京未勝利2000米賽事,Marinero喺9月跑完未勝利賽事之後就傷咗一直抖到今場先復出,起步好好反應自己放頭,雖然轉彎連達文騎嘅Lom Laeng留唔住隻馬由佢走自己守住第2位,但係直路上等Lom Laeng散咗就沿內檔衝返上去,大勝一場,Roy成功賺520分。
https://www.youtube.com/watch?v=KCfSfXZu6II

守尾門就有Danon Galaxy,呢匹「有型露比」(Denim and Ruby)全弟上場本來出戰青葉賞,點知排完位退出,落嚟呢組得4隻對手,一路跟住大家跑,直路齋跑200米就掃晒,KC成功賺750分做咗今日大贏家。總結5月份Ramos仍然放頭,Patrick同P9分列二三位,仲有5個月時間睇吓後面追得返幾多啦!
https://www.youtube.com/watch?v=b2PzofsIfxk