【白雪姬後代分途贏G3 極峰之子捧走夏季2000系列冠軍】

Tony

日本夏季賽事完結篇,會同大家睇下3場三級賽同1場公開賽。

星期六上演札幌2歲錦標,出自白雪姬血統、阿媽係白毛斑點馬Buchiko嘅白毛馬Sodashi唔怕早段四疊望空同快步速,一入彎就加速彈甩對手,最終力拒另一匹馬女Uberleben來犯贏出呢場三級賽,破埋札幌2歲同程紀錄之外,亦係第一匹白毛馬贏出草地級際賽。隻馬跑成咁樣都可以捱到返終點呀?年尾希望錦標可以mark定佢先。

星期日雨中進行嘅小倉2歲錦標,上場未勝利大炒對手嘅Mondreise今場繼續做大熱門都無可厚非,川田將雅發揮難得唔差,都係要輸比另一隻初出炒對手5個馬位嘅Meikei Yell;後駒靠武豊一起步就留住走外欄有利場地,雖然同初出一場比福永祐一騎咁都係留到頭岳岳,但係一入直路武豊推多兩步就睇住Mondreise嚟食,贏呢場冇難度 !至於Meikei Yell阿媽就係白雪姬孫女Shiroinger,不過Meikei Yell就唔係白毛啦。

夏季最後一場級際賽新潟紀念,全世界冇人要條內欄,比咗「二公子」(Jinambo)用條內欄加速取得領先位置,入到直路再移返出外欄諗住鬥爆一段,點知守中間位嘅Bravas入直路打開晒門就起勢追,終點前岩岩趕過「二公子」,憑住1W1Q成績贏出夏季2000系列賽事。呢匹一級賽盟主「極峰」(Verxina)嘅仔,嚟緊跑10化郎路程應有所作為。大熱門「天神傳說」(Wakea)同批年長馬鬥爆一段騎落去完全冇貨交;今年跑過三冠賽事批3歲雄馬對年長馬,除咗「萊伯城鎮」(Rhinebeck)跑泥地2勝條件賽贏到之外其他全軍盡墨,星期六札幌亦有皐月賞第4名「紅瑪瑙」(Win Carnelian)出戰2勝條件賽結果三甲不入,水準似乎要打問號先得。

最後就係札幌賽事拾遺,星期日仲有一場公開賽丹頂錦標,「石灰岩谷」(Bozzhira)換橫山武史上陣,唔同上次武豊比對手走甩自己執返個第2,今次橫山武史識得跟大隊一齊入彎發力,轉入直路後面冇馬埋到佢身,事隔半年再贏馬。嚟緊喺啲二級賽應該會見到佢出場,只係現階段跑大賽似乎大想頭咗。

Photo: Netkeiba
重播:
https://www.youtube.com/watch?v=Zcrnbwm4cG8
https://www.youtube.com/watch?v=RmUfnNW9KoA
https://www.youtube.com/watch?v=Ud6gm18KDHw
https://www.youtube.com/watch?v=cCtzb_m38kc