【用鞭改革】英國陣上將只限打反手鞭 嚴重或被取消賽事資格

Homan

12 July 2022, 2:44:02 pm

英國甚至歐洲一直有規限騎師喺陣上用鞭,近年最為所熟悉就係騎師喺直路上打鞭時唔能夠多於一定鞭數,否則會被罰款及停賽。各地馬會不時會檢討有關規定,再改善陣上用鞭規則。

今日英國馬會董事局接納用鞭資詢委員會多達20項建議,預計會喺今年秋天實行。該委員會由業界人士組成,當中有著名練馬師高仕登,原定於2020年提交有關建議,礙於疫情延至今個月才完成。該委員建議從限制打鞭方式及加強刑罰出發,以改善騎師陣上違規用鞭。

委員會建議騎師未來只可以喺陣上用反手鞭鼓勵賽駒前進,以減少騎師揮臂幅度。然而,如因安全理由而需要打正手鞭,亦屬可以理解。屆時如果出現呢個情況,將交由董事裁決。而打鞭次數會保持不變,即平地賽全場唔可以多過11鞭,直路上唔可以多過7鞭;跳欄賽全場唔可以多過12鞭,直路上唔可以多過8鞭。

刑罰方面,騎師現時違規的話,需停賽及罰款。委員會建議加強刑罰,如騎師違反一場賽事的打鞭次數,頭馬資格會被取消。而監場董事有權喺賽事當日執行,意味著賽果即日會因打鞭次數而出現變動。除此之外,騎師違規嘅停賽日數亦延長不少,如騎師喺一般賽事違規,量刑起點由七日加至十四日,而大賽違規的話,量刑起點由九日加至二十八日。罰款亦相應提高。

新規則預計於今年秋季實施,詳細仍要等英國馬會進一步公布。

英國嘅騎師協會Professional Jockeys Association主席麥柏程(PJ McDonald)就表示今次委員會從多角度嘗試改善騎師用鞭,亦提裁決嘅一致性,係一個好好嘅做法。但佢希望取消賽事資格呢項罰則只適用於某一啲經常違規嘅騎師。而今屆美國育馬盃賽事,其實亦只限騎師用反手鞭,賽事亦都順利進行。

雖然限制左打鞭嘅方式,但馬匹組織World Horse Welfare就認為有關做法未夠好。當然佢地歡迎教導騎者正確嘅用鞭方式,但佢地認為限制打鞭方式未能滿足佢地。佢地希望終有一日,鞭並非用作鼓勵賽駒前進嘅工具。

措施一出相信會吸引到當地唔少討論,未知英國馬會唔會就意見少修少補。


Source: Racing Post, At The Races
Photo: Racing Post