【班救兵?】澳洲騎師嘉里、莫丹尼獲發半季牌照

Homan

3 January 2022, 1:50:05 pm

史卓豐喺上月中離港,而蘇兆輝亦放棄來港客串。雖然話希威森同潘頓復出在即,但馬會都決定發牌比外來騎師,畢竟稍後仍有唔少騎師等住停賽。

兩位澳洲騎師嘉里(Luke Currie)及莫丹尼(Daniel Moor)獲發騎師牌照至季尾。兩人牌照生效日期未定,相信要等兩人抵港後接受隔離,完成後就會生效。

嘉里現年四十歲,曾到毛里裘斯及新加坡客串,現時以澳洲維省為策騎基地。上年喺維省城市馬場騎師排行榜以26場頭馬位列11名,得勝率約百分之十。若計埋鄉鎮馬場成績,佢上季贏得50場頭馬,位列總排行榜34名,得勝率為百分之十二。

嘉里曾贏得十三場一級賽,當中最為人熟悉相信係策「日光輝映」(Sunlight)贏得古摩亞育馬場錦標及威廉烈特錦標兩項一級賽。

莫丹尼現年37歲,於澳洲出道並較早前喺新加坡策騎過一段時間。佢喺2020/21澳洲馬季番到維省發展。上年喺維省城市馬場騎師排行榜以14場頭馬位列21名,得勝率約百分之九。若計埋鄉鎮馬場成績,佢上季贏得75場頭馬,位列總排行榜14名,得勝率為百分之十。

莫丹尼踏入今季先贏到第一場一級賽頭馬,佢喺啱啱過去嘅春季策Sierra Sue攻下羅柏奇勒爵士錦標,再策Wild Ruler贏得摩亞錦標。然後再喺萬利嘉多錦標策Jonker贏馬。當時一個月內三勝一級賽,氣勢一時無兩。

兩位騎師除左都係澳洲人外,都曾經喺新加坡上過陣,究竟來港後會有幾多支持呢?

Source: HKJC
Photo: HKJC