【猶如坐監】薛恩放棄續牌 季尾離港

Homan

18 April 2022, 4:20:24 am

澳洲騎師薛恩今季憑「顯心星」及「將王」兩勝一級賽。早前佢曾指Racing Bubble令佢覺得唔似生活緊,精神一直受壓。

薛恩接受本地媒體訪問就話自己唔會申請來季續牌,佢話呢段時間生活喺Racing Bubble下,佢唔可以同其他朋友出去,完全唔似生活。佢形容自己生活喺監獄入面。精神壓力幾近爆煲。佢認為最佳方法就係回歸澳洲策騎。因此佢決定放棄續牌申請,並於季尾離開香港。

呢半季香港馬會為左令賽馬得以繼續進行,收緊騎練外出限制。早前騎師潘頓出外睇脊醫一度被拒絕,及後審核後得以有條件下放行。而有報導都話練馬師剪頭髮都遇到困難。

無疑馬會現時對騎練及馬房手足限制的確令賽馬得以順利繼續進行,但騎練有坐監嘅感覺亦無可厚非。有能力可以到其他地方發展嘅,考慮離開都好正常。近日疫情有緩和跡象,馬會相信都有解除部分限制,不過一旦再爆發係咪收得咁緊呢?其他有意來港嘅騎師會唔會因為咁而唔黎呢?都會係之後馬會黎緊邀請騎師時會面對嘅問題。

Source: Racing.com, SCMP
Photo: HKJC