Tony

16 March 2022 at 7:12:12 am

今個星期日本有3場級際賽，除咗金鯱賞仲有5個櫻花賞優先出賽位。

星期六中山就舉行1800米三級賽中山牝馬錦標，近年呢場成為爆冷溫床，今年亦不例外，前年贏過同場同程三級賽百花盃嘅「傾城猛火」(Ablaze)上年只係贏一場公開賽其餘場場冇影，今場做冷門唔出奇。菅原明良今場跑得唔錯，14檔起步沿途守住三疊，轉彎入直路早發力諗住搏走甩，但係揹56公斤多少有影響彈唔甩對手，反而另一隻冷門「栗本大賞」(Kurino Premium)今場揹53公斤輕飄飄，留得後過「傾城猛火」都冇問題，兩隻馬鬥足一條直路，松岡正海最後50米再騎落去就控制大局。
https://www.youtube.com/watch?v=gZuZP8QQ5N4

星期日賽事就由中京打響頭炮，2000米二級賽金鯱賞，有13隻馬角逐，望住個陣容都好過香港，又有「麗冠花環」(Lei Papale)、「紅線情牽」(Akai Ito)一對G1馬復出，仲有「山嶺寶穴」(Sanrei Pocket)、「菜圃向榮」(Potager)等左轉好手，齋睇呢手Cast你香港都比下去啦！大熱門落喺由條件賽開始4連勝嘅Jack d'Or身上，上場贏完表列賽白富士錦標之後就部署今場，初次跑二級賽仲要面對一級賽盟主，呢場考牌考成點？一起步就自動波上去放頭，仲要段段11秒快放，入直路見藤岡佑介再騎一騎彈甩後面幾個馬位，「麗冠花環」追到氣咳都埋唔到身，結果贏2個半馬位造出5連勝，望埋時間1分57秒2破咗場地紀錄。呢場贏得咁出色，Jack d'Or開埋去大阪盃挑戰「樂透心」(Efforia)都係預料之中，加埋「非洲寶金」(African Gold)鬥放，今年啲步速都唔慌慢得去邊！至於「麗冠花環」，本來睇佢口氣就想嚟香港跑女皇盃，不過而香港疫情嚴峻，外隊馬難以抵港。而家香港馬會就決定圍內搞掂，唯有揀衛冕大阪盃用返川田將雅操刀。跑入一席第3嘅「紅線情牽」今場已收熱身之效，到時大阪盃再見。
https://www.youtube.com/watch?v=D30FbulzndM

另一場阪神嘅1400米二級賽報知盃，三甲可以直入櫻花賞；身價100萬*40口嘅Sunday會一口馬Sublime Anthem上場喺未勝利賽中憑對手犯規升上頭馬，今場4檔出閘之後守住內欄第9位左右，入到直路拉出去中檔同對手鬥爆，結果爆一段34秒2力壓Namura Clair，堂堂正正贏返一次；Namura Clair呢組級數贏晒，但係轉彎入直路蝕幾個馬位，爆完一段出咗頭冇耐就比人過返，呢個第2只係恰如其分；岡浩二名下另一匹馬Anegohada繼早前「紅線情牽」之後又跑入一席第3，三駒一齊出線跑櫻花賞。
https://www.youtube.com/watch?v=MXz07DWbCrk

中山就有1600米表列賽海葵錦標，爭2個櫻花賞出線位，「氣概凜然」(Dee Majesty)子嗣Cross Majesty喺9檔出閘之後守住第2位，入到直路趕過放頭嘅Rivoli再彈甩後面幾個馬位奠定勝局，後面Raspberry Mousse直路上少少塞車，但係修正完再衝上去反應好過其他對手跑入一席第2，一對個人馬主名下馬一齊出線。Cross Majesty本身冇報三冠，贏完呢場都係比錢報名跑櫻花賞好過，睇吓呢匹身價不過760萬圓嘅馬女仲有冇燒鵝味道。
https://www.youtube.com/watch?v=c4mQRzeEJgA

年屆11歲嘅欄王「長山之馬」(Oju Chosan)繼續服役，喺星期六嘅阪神春季跳欄賽復出，不過年紀大一歲讓多2公斤似乎爭啲啲，比另一老馬A Shin Click得手。呢匹A Shin Click兩年幾之前跑長途馬錦標就同「長山之馬」同場，當時跑第3，轉戰跳欄之後贏過2場；今場雖然出閘慢半拍，但係好快就追返上去，轉入直路彎已經發力彈甩「長山之馬」，直路保住勝局，「長山之馬」就跑入一席第3。「長山之馬」下場就會力爭第6次贏出中山春季跳欄賽，雖然話老馬跑跳欄仲好，11歲都算黃金期，但係今場贏唔到正本戲有冇暗湧㗎？
https://www.youtube.com/watch?v=o1CgCnSeyjE

新騎師方面就有今年唯一女將今村聖奈交出頭馬，星期日阪神4歲1勝泥地1800米賽事，佢騎Brabeio沿途守住第6位，轉直路彎已經拍住前面放頭馬，直路上唔使點大力騎就趕過對手，贏來不費吹灰之力，第17次上陣終於開齋。
https://www.youtube.com/watch?v=Ifu8hfiKC8M

知舍POG今個星期得1匹馬贏到，星期日阪神1600米未勝利賽事，Dicky名下嘅Methuselah同Tony名下嘅Chronicle Nova同場上陣，Methuselah沿途守住馬群前列，入直路打開門就同Leon Barows鬥足400米，終點前影相壓贏，幫Dicky拎520分，至於Chronicle Nova就只得第3。
https://www.youtube.com/watch?v=unn07Mu_e4k