【為引退馬謀福祉】日本退休練馬師角居勝彦為引退賽駒建立小天地

Homan

2 December 2021, 3:10:35 pm

現年57歲練馬師角居勝彦於今年二月尾引退,當時希望抽多啲時間可以打理家族宗教事業。從練期間曾訓練多匹一級賽冠軍,如「伏特加」(Vodka,ウオッカ)及「神威啟示」(Epiphaneia,エピファネイア)等。角居勝彦引退其實仍然與馬匹結下不解之緣,甚至運用自身嘅專業知識,帶更多引退馬進入社區,令佢地不致被遺棄。

近日JRA訪問角居勝彦,製作一條15分鐘嘅短片,講述角居於退休後十個月內,點樣為引退賽駒尋找容身之所。佢得知北陸地區珠洲市嘅一個農莊希望引入一匹馬,角居因此聯絡對方並表示自己可以為佢引入一匹退役馬,而佢就係Dream Signal(ドリームシグナル)。

起初農莊負責人大野並不認識角居,但對方相當專業。因此相當信任對方並接納對方意見為引退馬建造一個更大嘅容身之處,等Dream Signal有足夠地方活動。而Dream Signal去到農莊後亦好快與當地居民相處融洽,佢亦不時有「任務」,早前亦到當地沙灘協助打掃嘅工作。而佢嘅工作就係將沙灘嘅垃圾運走。佢亦希望透過呢啲「任務」令當地居民與馬匹有更多交流,令互相之間有更多認識。

雖然佢成功協助Dream Signal搵到新容身之所,但角居有感要協助更多嘅引退馬,咁樣唔足夠,認為需要有一個引退馬project,資金要足以應付佢地自給自足。

後來佢與前身為益田競馬場嘅さんさん牧場連繫起黎。さんさん牧場旁邊嘅松ヶ丘病院為一所精神科醫院,さんさん牧場會為該醫院嘅精神病康復者提供就業機會。該醫院嘅醫生就表示唔少康復者出院後錯過左發展事業嘅時機,康復後有時會因為缺乏一技之長而未能於社會找到工作。

さんさん牧場嘅存在,令呢班康復者可以有穩定工作。作為社企嘅さんさん牧場對於馬匹認識並不多,幸得角居提供專業意見,讓佢地可以好好照顧馬匹。佢亦提供不少來源讓退役馬進駐牧場,同時令更多退役馬找到容身之所。さんさん牧場除左讓工作人員照顧引退馬外,亦讓佢於開放公眾參觀時擔任導賞員,等佢地多啲機會與大眾接觸,亦有助工作人員融入社會。

除左協助自給自助嘅計劃,角居亦都將引退競賽馬引入於傳統節日祭祀之中。於日本今治菊間町有一傳統節日祭祀活動,要求當地年輕人坐於馬匹上並喺極斜嘅斜路上奔跑。以往菊間町會於活動中利用農耕馬,但近年佢地都會購入引退馬作為活動之用。由於町內嘅馬日漸年老且越黎越少,因此町內嘅人決定尋求角居協助。角居得知不但協助佢地尋找合適嘅退役馬比佢地,更發現大把分參加祭祀嘅年輕人根本無相關訓練,要參加有關活動相當危險,因此佢特意前往當地為呢班年輕人提供訓練,令佢地可以基本嘅技術操控,安全完成活動。

於競賽世界入面,如果去到三歲九個月都未有頭馬嘅賽駒,好多都會被放棄。(現在可以留喺JRA角逐或轉到地方競馬)。或許引退上天比左呢個機會佢可以為呢啲馬做得更多,回饋佢地及未來面對相同處境嘅馬。佢希望透過呢啲人與人之間嘅交流,將佢對於馬匹嘅知識傳授。同時佢可以自己嘅名氣、知識、人脈,協助安排引退馬尋找容身之所,同時推進唔同協助引退馬嘅項目。佢話希望於有生之年可以做到佢希望達到呢一啲嘅目標。角居勝彦從練馬到協助引退馬,一生與馬結下不解之緣,亦不斷思考如何有更多引退馬受益,實在非常難得。希望佢嘅計劃可以令更多馬受益。

JRA訪問:https://youtu.be/wWnhvRDKPhU


Remarks:喺同一個channel仲有參考美國 Old Friends開設嘅引退馬設施Old Friends Japan介紹。有興趣就可以睇下,我地稍後都會介紹下。

Source: JRA
Photo: 影片截圖