【澳洲馬圈】麥道朗回應戴勝自行分配時間論：返去你個井到啦！

Homan

27 March 2023 at 12:54:17 pm

早前騎師苗康文開腔表示近日澳洲馬圈發生多宗墮馬意外，皆因騎師過份疲勞所致，指出現時澳洲騎師工作量過於繁重嘅問題。傳奇騎師戴勝反駁呢項言論，並指前列騎師應該要自行分配時間，並且學識拒絕。

當中被點名嘅麥道朗上星期就喺佢自己Racenet嘅專欄到回應戴勝，佢就話以前戴勝可以用自己嘅方式去推坐騎，等自己可以喺週中休息。不過佢就話今時唔同往日，佢需要主力為馬房策騎，馬主同練馬師都需要你為佢地策騎，令到佢唔可以拒絕坐騎。

麥道朗話相信其他騎師都面對緊同樣嘅情況，無論新南威爾斯州、西澳及昆士蘭嘅騎師都會面對呢個情況。維省嘅騎師尤甚，佢地除左難推坐騎外，仲會有唔少嘅星期五夜賽，並再喺星期六日賽上陣，佢地嘅休息時間更少。

澳洲馬會早前就暫時無計劃會改變賽程。Racenet就騎師疲勞問題，訪問左全澳洲多位前列練馬師及騎師，佢地都呢個議題都唔少意見。冠軍級騎師岳禮華就話越黎越多嘅夜賽，對佢地嘅生理時鐘有好多影響，尤其週三至週六都相當繁忙，如週五早上有彈閘，晚上會有賽事，週六早上再有賽事。星期五晚上完成賽事後回到家已經很晚，週六賽事開始時間又無推遲，以致騎師們缺乏休息。佢就建議將彈閘改去週一或二會令騎師有更多時間休息。另一位騎師麥利奧就表示佢自己會盡力喺一個星期內安排一日比自己休息，但佢話並非咁容易做到。

NSW騎師麥維凱就話現今嘅騎師比起20-30年前嘅騎師上陣次數更多，而且越黎越多傍晚及晚上嘅賽日。而且騎師們被期望週中上陣。佢自己唔同意佢地避免喺週中賽日上陣。

喺維省同NSW同時設倉嘅馬漢雅就話大馬房唔算有好大影響，畢竟佢地有唔少員工。不過佢就話如果有20至25匹賽駒嘅馬房，樣樣親力親為就會好攰，尤其參加埋夜賽就會好攰。

今次嘅議題源於近日多位騎師喺陣上墮馬，當中包括布浩榮，陸景滔、韋紀力及賈傑美。佢地雖然並無大礙，但預計都要休養一段好長嘅時間。當中賈傑美嘅另一半苗康文提出騎師工作量太重，影響陣上判斷引起意外。究竟澳洲馬會最後會唔會聽從意見，喺開賽時間上有啲轉變呢？


Source: Racenet
Photo: Racenet
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1