【滿樂時子嗣初勝重賞 Win5史上最高派彩誕生】

Tony

11 January 2021, 4:58:06 pm

今個星期係日本成人之日嘅關係,JRA就跑三日馬。

星期日先上演新山紀念,近年冠軍由「貴婦人」到「覓奇島」再到「杏目」,可以話粒粒皆星。今年就到Pixie Knight呢匹「滿樂時」子嗣發威,起步搶出之後即一放到底奪冠,除咗幫父系首勝級際賽之外,鞍上人福永祐一亦贏得第2400場JRA頭馬。至於跑第2嘅Rooks Nest都係「滿樂時」子嗣,重賞一係唔贏,一贏就一Q返。
https://www.youtube.com/watch?v=guSvQk9Drak

星期一就有仙女錦標,Fine Rouge由1200米初出慢慢增程去到1600米一樣冇問題,見李慕華入直路齋推騎,隻馬自己擺住正腳好似摩打咁彈甩對手,呢個馬主第一匹名下馬咁就贏返場三級賽;睇佢姿態咁輕鬆,遲啲三冠對Sodashi都幾有威脅。
https://www.youtube.com/watch?v=wj_Jm6LoTl0

跟住到精選條件賽系列:星期六嘅中京就有蝦碌嘢,表列賽淀短距離錦標,由換咗池添謙一上陣嘅Travesura勝出;不過今次唔係講佢,係講下「訂做迷」(I Love Tailor)。大家對佢上年喺中京跑高松宮紀念跑咗唔夠200米就收慢應該記憶猶新,今次改配岩田康誠上陣又出事,臨開閘突然向後,結果漏閘漏成10個馬位包尾而回,又要停賽兼做閘廂測試不特止,岩田仲要罰多1萬蚊。
https://www.youtube.com/watch?v=29z7OvVcMC0

至於星期日中京嘅2勝條件賽,就有曾經去美國遠征嘅「狙敵」(Jodie)表演,入直路李慕華趁前面放頭馬收工就沿內欄衝刺,後面Narita Zakura同「俊秀男兒」(Endymion)一路都埋唔到身,傷後復出第3場終於取得久違嘅勝仗。呢隻「狙敵」如果唔係因傷休息一年,成就應不至此,而今年好大機會係最後一季上陣,睇下可唔可以爭下啲Group Race交代啦。
https://www.youtube.com/watch?v=UF-S-aRkymQ

星期一嘅Win5造出史上新高派彩,1注獨中派4億8千幾萬元,一切源於第3關中京嘅3勝條件賽,呢場係由大冷門Two M Alonso贏出,叫糊票數由6萬幾票變到187票;不過大家可以留意下換咗川田將雅騎嘅「敏智女神」(Pallas Athena)點跑:轉彎留緊尾二,入直路居然唔移出大外檔衝揀入面等位?後過佢果隻Danon Majesty見和田龍二都識飛出大外檔啤酒園見,呢隻最後追唔切得第2輸得條氣順姐,「敏智女神」搵完一大輪位遲晒大到跑第4,買佢WP一蚊都收唔返,買佢Win5就斷纜,仲唔吐血死?
https://www.youtube.com/watch?v=RyxbcZxpFL8

Photo: Netkeiba