【浪漫勇士大敵】滂薄無比再贏中山紀念

Tony

1 March 2023 at 6:56:32 pm

睇完岩岩過去星期日嘅香港金盃，一齊睇埋兩場同日舉行嘅日本級際賽。

首先係阪神1400米三級賽阪急盃，早前宣稱會喺呢場復出嘅「妙發靈機」再度受傷缺陣，加上Meisho Bengal退出，得返15匹馬上陣。Ramos喺上年3歲POG揀過嘅Aguri上年年尾贏3勝條件賽升班，今場對手冇咗「妙發靈機」得返「攻必勝」(Grenadier Guards)擔大旗，一起步就搶上前，沿途喺第2位跟住「名將鈦金」(Meisho Titan)後面，入直路橫山和生一騎就已經彈甩馬群，「嚴父勁跑」(Daddy's Vivid)沿途跟喺第3位入到直路梗係咬住唔放，兩隻馬單打獨鬥，都係Aguri步步贏，成功四連勝，下場出戰高松宮紀念睇有冇機會幫POG古馬組拎第1場G1頭馬。
https://www.youtube.com/watch?v=4vw-_0C2UyY

跟住到1800米二級賽中山紀念，與其話係大阪盃預賽，不如話係杜拜賽期以及香港女皇盃最後檢閱，近年由「新寫實派」、「勝出光采」以至「本初之海」都係成功例子；前年香港盃亞軍「滂薄無比」上年跑寶塚紀念得亞軍然後中暑，幾乎性命不保，結果成個秋季全休；今場事隔大半年復出係睇佢跑唔跑得返昔日水準，早段守第9位跟住「幻蹤黑豹」(Elusive Panther)後面，轉直路馬群開始加速推騎但係松山弘平紋風未動，等到入直路先開始郁手，雖然比「艷玫華彩」(Stunning Rose)阻一阻但修正完兜佢左邊一騎就過，最後100米控制大局，繼前年之後再贏同場。「滂薄無比」成功復活，贏完呢場再報名香港女皇盃可以話準備收請帖，相信到時係出擊所在，就算「浪漫勇士」換人一樣唔驚！至於其他對手，上年香港盃亞軍「野田小子」轉彎已經要推騎結果輸成條街，仲要入咗閘喺閘廂又搞搞震被罰停賽30日，杜拜草地大賽冇得跑，大阪盃又趕唔切，睇嚟要寄望香港；上場贏出中山金盃嘅「名劍」(Lagulf)沿途同「滂薄無比」走差唔多位置，直路拉出去大外一氣追一段跑第2，已收熱身之效，下場跑大阪盃可以留意。
https://www.youtube.com/watch?v=cL_PwCjRqhw

跟進賽事就有3歲馬擔綱、星期六阪神2200米表列賽堇菜錦標，3匹POG對3匹安全車，之前戰報已經提過金子真人名下嘅Shazzan會係友道康夫呢個名門馬房嚟緊嘅大賽棋子，今場考牌戰就換上岩田望來，起步撞一撞變咗喺包尾有少少脫節，一路跟到最後600米先發力，轉直路彎慢慢移出去爆一段，Shonan Bashitto喺內欄追一段都唔錯，但係Shazzan反應幾好最後幾步壓過對手贏到收韁，輕勝而回，幫Tony、Pisa、佳及薯條賺2000分。Shazzan今場造個全場最快600米33秒1姿態相當吸引，下場跑皐月賞有力成為一路奇兵。
https://www.youtube.com/watch?v=Np_ntAP5e8A

另一場星期日阪神4歲以上3勝3000米松籟錦標，可以話係嚟緊阪神大賞典、以至春季天皇賞嘅參考賽事。兩年半冇贏過嘅G1會一口馬、年屆8嘅歲Segen今場首度增程跑3000米，論近況不及同為G1會嘅Time of Flight，但係今場關鍵在於邊個跑法主動，Segen早段留到尾四位置，鮫島克駿去到對面直路先追少少，轉彎入直路之前已經喺第6位，反而Time of Flight走位越嚟越後轉彎仲喺第8位，阪神短直路咁嘅走位已經輸一半，直路上見鮫島推騎Segen動作話比你聽好想贏呢場，終點前控制大局爆冷而回，Time of Flight喺內欄推進唔少但為時已晚只得亞軍。
https://www.youtube.com/watch?v=TFsE1SgosPE

知舍POG仲有1匹馬勝出，星期六中山未勝利雌馬2000米，少見有雌馬可以用大外一氣嘅姿態一出即勝。Sunday會一口馬Deux Moulins用橫生和生初出排17檔，早段泊車留喺尾二位置落後前面10個馬位，去到800米開始慢慢追貼馬群，仲有600米喺彎位就開始發力，橫山和生入直路擺正堂軚騎落去交到反應追上前，人哋對手都係爬緊返嚟佢落腳仍然有力，結果贏1又4份3馬位收韁過終點，姿態幾吸引再出可留意，亦幫Pisa加550分。

總結2月份成績，南總仍然領先，佳及KC緊隨其後，Homan守住第4位。
https://www.youtube.com/watch?v=g3eNl-4qJYM