Homan

2 June 2022 at 9:02:27 am

由放棄從化倉到今日馬會官宣，呢幾個月不斷有蘇保羅放棄香港練馬師牌照嘅消息。

蘇保羅琴日晨課已經同傳媒交代呢個消息。根據SCMP報導，佢就話自己四個馬季之前已有呢個念頭，去到兩個馬季前就認為自己即將要放棄練馬師牌照並離開香港。

稍後佢就會同馬主講呢個消息，並主力為旗下33匹賽駒搵新屋企。對於自己嘅決定，佢話自己喺香港已經18年，現年62歲嘅佢仲有好多野想做，認為而家開始好過到左66歲先開始，咁樣可以有多啲時間同體力享受生活。

被問到會唔會再喺紐西蘭練馬，佢就話一定唔會。不過佢就會喺南半馬主力賽駒買賣。另外，佢話唔介意當細佬蘇利雲及其練馬拍檔施葛德唔得閒果陣幫下手，順便去下馬場嘆下咖啡同人吹下水。

蘇保羅截至今日為止，喺香港18年贏左512場頭馬。當中最令人印象深刻當然係「友瑩格」，該駒曾出2014及2016年嘅香港短途錦標，同時亦喺海外贏得高松宮紀念賽及KrisFlyer國際短途錦標。服役11場頭馬中有五場一級賽冠軍，同時都係2014/15年香港最佳短途馬。

而2007年香港打吡冠軍「活力金剛」及2010年董事盃冠軍「友誼至上」都係其代表作之一。


Source: HKJC, SCMP
Photo: HKJC