【橫山典弘啦啦隊成員】King of Koji傷完贏G2

Tony

26 January 2022, 7:41:42 am

今個星期日本舉行兩場二級賽。

首先係中京跑泥地嘅東海錦標,Auvergne呢匹上屆盟主向來跑中京出色,今年打衛冕戰揹多1公斤換團野大成上去,早段跟住段段12秒幾快步速咁快,直路上偷內欄發力以為頂到完場,點知數漏另一隻重賞盟主Suave Aramis,松田大作近兩場比隻馬用返後追戰術今場終於奏效,最後600米爆足一段37秒2追足一條直路,終點前趕過Auvergne取得二月錦標優先出賽資格。
https://www.youtube.com/watch?v=WyjRgedXWgw

之後到中山嘅美國賽馬會盃,呢場有隻地方馬Castle Top放到咁快,結果跟前就全部死晒!今次就成功攬炒李慕華騎嘅「堅之石」(Orthoclase),轉彎跟住前面隻馬踩油用咗,直路就企晒喺度,結果跑第6;前年贏過目黑紀念嘅King of Koji上年復出跑2場都做啦啦隊,今場回復水準,沿途留喺尾二位置跟住Meiner Fanrong尾,直路上加埋留到包尾嘅「淺間發威」(Asamano Itazura)三隻一齊鬥爆,結果King of Koji彈甩Meiner Fanrong再贏二級賽。King of Koji嚟緊目標大阪盃,阿爸可以留定名做阿仔啦啦隊先。
https://www.youtube.com/watch?v=9G1ISqRc8rE

最後就要講表列賽若駒錦標,睇「金鎗六十」點樣比人用戰術造低之前先睇呢個差唔多嘅,身價5億、菊花賞賽日新馬賽一出即勝嘅Riad今場用武豊做替工都熱到1.6倍開跑,不過今場武豊都算老貓燒鬚,1檔起步之後搶上前放一段,之後比Lubeck上前放頭自己守住第3位,轉彎比「佳日」(Gran Dia)同Meisho Lanakila層層冚,冚足半條直路,等到Lubeck走甩先追已經太遲。Lubeck之前初出戰報已經報導過,呢匹「迪雅卓」全弟今場再執1200萬本賞金,開去三冠條路都幾暢順。
https://www.youtube.com/watch?v=AYLr-xx4Sy8