【杜拜世界盃嘉年華】南澳兩駒將戰杜拜 一女將將陪同出戰

Homan

29 December 2021, 7:11:20 am

要參加杜拜世界盃賽日嘅各項大賽,除左本身喺各大賽表現優異,亦可以參加由一月開始嘅杜拜世界盃嘉年華賽期賽事。

來自世界各地嘅賽駒如南美烏拉圭、巴西;北歐如瑞典及挪威等都會出戰一月開始嘅杜拜世界盃嘉年華賽期賽事。今年除左有佢地之外,南澳賽駒亦有意出戰。

由郭朗堅(Will Clarken)訓練嘅He's A Balter及Parsifal將會喺來年一月中出發前往杜拜,並會出戰當地賽事。兩匹賽駒同時於南澳服役,啱啱喺兩場表列賽上名。郭朗堅將會派一名馬房助理同行照料賽駒,並希望搵一位騎師陪同遠征。

最後佢搵到南澳騎師Caitlin Jones,當初Caitlin Jones以為郭朗堅搵佢到當地幫手操馬。不過郭朗堅不單止搵佢主理操練,更希望Caitlin Jones可以為兩駒執韁喺杜拜賽事上陣。意味著呢位今季得勝率約百分之八嘅騎師將可以喺杜拜出賽。

Caitlin Jones表示呢個係一個難得嘅機會,雖然佢曾於英愛協助晨課,但去杜拜係第一次,所以佢決定即使喺南澳缺席兩個月左右,但佢都願意陪同郭朗堅賽駒遠征。睇下呢位女將到時除左呢兩匹座騎外,睇下仲有冇外線座騎喇!


Source: Racenet
Photo: Racenet